චීන ශ්රී ලංකා ආර්ථික, ආයෝජන සහ සංස්කෘතික සබඳතා වර්ධනයට පියවර ගෙන තිබෙනවා.
ඒ අද අරලියගහ මන්දිරයේ දී අග්රාමාත්ය දිනේෂ් ගුණවර්ධන සහ චීන ජනාධිපති ෂී ජින් පිං, රාජ්ය මන්ත්රී ෂෙන් යිකින් (Shen Yiqin) මහත්මිය ඇතුළු විශේෂ නියෝජිත පිරිස හමු ව සාකච්ඡා කිරීමෙන් පසුවයි.
ශ්රී ලංකාව වෙත චීනය ලබාදෙන අඛණ්ඩ සහයෝගය ඉතා ඉහළින් අගය කරන බවත්, චීනය සහ ශ්රී ලංකාව අතර ආර්ථික සහයෝගීතාව තවදුරටත් පුළුල් කර ගැනීමේ විශාල හැකියාවක් පවතින බවත්; මෑත කාලීන ණය අර්බුදයෙන් පසු ආර්ථිකය යථා තත්ත්වයට පත් කිරීම සඳහා ශ්රී ලංකාවට ලබා දුන් සහායට ස්තුතිවන්ත වන බවත් අග්රාමාත්යවරයා මෙහිදී පැමිණ සිටි විදේශීය අමුත්තන් අමතමින් ප්රකාශ කළා.
සෘජු පෞද්ගලික ආයෝජන මෙන් ම කෘෂිකාර්මික ක්ෂේත්රයේ ආයෝජන සහ අපනයනය, පුනර්ජනනීය බලශක්තිය, තොරතුරු තාක්ෂණ, අධ්යාපනය ආදී ක්ෂේත්ර සඳහා ආයෝජන මෙන් ම, පවතින ආර්ථික ප්රශ්නවලට දිගුකාලීන විසඳුම් ලබාදීම වෙනුවෙන් යටිතල පහසුකම් සංවර්ධනයට චීනයෙන් ලැබෙන්නා වූ සහයෝගය ශ්රී ලංකාව සාදරයෙන් පිළිගන්නා බවයි මෙහිදී අග්රාමාත්යවරයා අවධාරණය කරමින් කියා සිටියේ.
ශ්රී ලංකාවට පමණක් නොව අනෙකුත් ණය දෙන රටවලට සහ ජාත්යන්තර නියෝජිත ආයතනවලට චීනයේ සහයෝගය ලැබීම ශ්රී ලංකාවේ ණය ප්රතිව්යුහගත කිරීමේ ක්රියාවලියට සහාය වීම සඳහා විශ්වාසයක් ලබා දී ඇති බව ද අග්රාමාත්යවරයා මෙහිදී පෙන්වා දුන්නා.
සමස්ත චීන කාන්තා සම්මේලනයේ සභාපතිනිය ද වන විශේෂ නියෝජිත ෂෙන් යිකින් මහත්මිය පැවසුවේ, ශ්රී ලංකාව චීනයේ සමීපත ම මිතුරෙකු ලෙස සලකන බවත්, සහයෝගීතාව මෙන් ම නව ව්යාපෘති සඳහා ආයෝජනය කිරීමටත්, කොළඹ වරාය නගරය, හම්බන්තොට වරාය, දිළිඳුකම පිටුදැකීමේ වැඩසටහන්, අධ්යාපනය සහ කෘෂිකර්ම යන ක්ෂේත්ර පුළුල් කිරීමටත් සිය චීන රජය බලාපොරොත්තු වන බවයි.
දුෂ්කරතා මඟහරවා ගැනීම සඳහා ශ්රී ලංකාව ලබා ඇති ප්රගතිය දැකීමෙන් චීනය සතුටට පත්වන බව පැවසූ චීන රාජ්ය මන්ත්රීවරිය ආර්ථික අභියෝගවලට මුහුණදීමේ ප්රයත්නයන් සඳහා චීනයේ අඛණ්ඩ සහයෝගය ද සහතික කළා.
ජාත්යන්තර සමුළුවල දී ශ්රී ලංකාවේ ස්වෛරීභාවයට සහාය දැක්වීමේ චීන ස්ථාවරය පිළිබඳ ව අග්රාමාත්යවරයා මෙහිදී විශේෂ සඳහනක් කළ අතර ඊට ප්රතිචාර දක්වමින් ෂෙන් යිකින් (Shen Yiqin) මහත්මිය සඳහන් කළේ ශ්රී ලංකාවේ නිදහස සහ ස්වාධීනත්වය, ස්වෛරීභාව සහ භෞමික අඛණ්ඩතාව වෙනුවෙන් චීනය සැමවිටම පෙනී සිටින බවයි.
මෙම හමුවේ දී දීර්ඝකාලීන සංස්කෘතික සබඳතා තවදුරටත් ශක්තිමත් කර ගැනීමේ වැදගත්කම අවධාරණය කළ චීන තානාපති කිව් ෂෙන් හොං (Qi Zhenhong) මහතා ආගමික බැඳීම්වල කල් පවත්නා සංකේතයක් ලෙස ශ්රී ලංකාවේ විශාලතම බුද්ධ ප්රතිමාව ළඟදීම ඉදිකිරීමට චීනය යෝජනා කරන බව ද කියා සිටියා.
මෙම අවස්ථාවට චීන ජ්යෙෂ්ඨ නිලධාරීන්, රාජ්ය අමාත්යවරුන් වන ජානක වක්කුඹුර, අශෝක ප්රියන්ත, ගීතා කුමාරසිංහ, පාර්ලිමේන්තු මන්ත්රීවරුන් වන සුදර්ශන දෙණිපිටිය, යදාමිණි ගුණවර්ධන, රාජිකා වික්රමසිංහ, මුදිතා ද සොයිසා, මංජුලා දිසානායක, කෝකිලා ගුණවර්ධන, සහ අග්රාමාත්ය ලේකම් අනුර දිසානායක යන අය එක්ව සිටි බවයි අග්රාමාත්ය මාධ්ය අංශය පැවසුවේ.
