අමානුෂික අන්දමින් පුද්ගලයකුගේ දෙපාවලට මොට ආයුධයකින් පහර දී, කඩුවකින් ගෙල කපා සිරුර කිරිමැටි වළකට විසි කළ පුද්ගලයින් සිව්දෙනෙකු කළුතර කොට්ඨාස අපරාධ විමර්ශන ඒකකය විසින් අත්අඩංගුවට ගනු ලැබුවා.
දසත ප්රාදේශීය වාර්තාකරු පැවසුවේ, මෙලෙස අත්අඩංගුවට ගෙන ඇත්තේ කළුතර – උග්ගල්බඩ ප්රදේශයේ පදිංචිකරුවන් බවයි.
පසුගිය වසරේ දී නොවැම්බර් මස 13 වැනි දා කළුතර – උග්ගල්බඩ ප්රදේශයේ පදිංචි ව සිටි පී.ඒ. ආර්.ගුණරත්න නමැත්තාගේ ගෙල කපා කිරිමැටි වළක ගිල්වා තිබියදී කළුතර -උතුර පොලිසිය විසින් සොයාගනු ලැබුවා.
ඝාතනයට ලක් වූ පුද්ගලයාගේ අනන්යතාව සොයා ගැනීමට ප්රමාද වූ බැවින් පසුගිය ජනවාරි මස 27 දින කලුතර නාගොඩ ශික්ෂණ රෝහලේ දී අධිකරණ වෛද්ය නිලධාරී විසින් පශ්චාත් මරණ පරීක්ෂණය පැවැත්වූවා.
එහිදී අනාවරණය වූයේ ගෙල තියුණු ආයුධයකින් කපා දෙපාවලට ද මොට ආයුධයකින් පහර දී ඇති බවට අනාවරණය වී ඇති බවත් ඒ බව කළුතර ප්රධාන මහේස්ත්රාත් අධිකරණයට දැනුම්දී ඇති බවයි.
ඒ අනුව පොලිසිය විසින් සිදු කළ දීර්ඝ විමර්ශනවලින් අනතුරුව මෙම සැකකරුවන් ඝාතනයට යොදා ගත් කඩුවක්, මරණයට ලක් වූ තැනැත්තා ව නිවසේ සිට පැහැරගෙන කිරිමැටිවල ආසන්නයට පැමිණි ත්රීරෝද රථය ද අත්අඩංගුවට ගැනුණා.
මෙම ඝාතනයේ ප්රධාන සැකකරු අයිස් මත්ද්රව්ය ජාවාරමක නිරත අයෙකු බවත්, ඔහු මත්ද්රව්ය අලෙවි කිරීම් සම්බන්ධයෙන් පොලිසියට ඔත්තුවක් දුන්නෙ යැයි යන සැකය මත තවත් මිතුරන් තිදෙනෙකු සමග ගොස් මරණකරුව පැහැරගෙන ගොස් ඝාතනය කර ඇති බවයි වාර්තා වන්නේ.
අත් අඩංගුවට ගැනුණ සැකකරුවන් අධිකරණයට ඉදිරිපත් කිරීමට නියමිත අතර කළුතර කොට්ඨාස අපරාධ විමර්ශන ඒකකය පරීක්ෂණ පවත්වනවා.
