ගාලුමුවදොර ගෝඨා ගෝ ගම අරගලයට පහරදීමේ සිද්ධියේ සැකකරුවකු වශයෙන් බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් අත්අඩංගුවට ගෙන ප්‍රකාශ සටහන් කර අධිකරණයට ඉදිරිපත් කරන ලෙස නීතිපතිවරයා වෙත නියෝගයක් නිකුත් කරන්නැයි ඉල්ලා ගොනු කෙරුණු රිට් පෙත්සමක් ගාස්තුවට යටත්ව නිෂ්ප්‍රභ කිරීමට අභියාචනාධිකරණය අද (27) නියෝග කළා.
අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ ඒ. මරික්කාර් යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල විසින් මෙම නියෝගය ලබා දී තිබෙනවා.
මෙම පෙත්සම විභාගයට ගත් අවස්ථාවේ දී දේශබන්දු තෙන්නකෝන් වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා මතු කළ මූලික විරෝධතාවක් පිළිගනිමිනුයි අභියාචනාධිකරණය මෙම තීන්දුව ලබා දී ඇත්තේ.
තීන්දුව ප්‍රකාශයට පත් කරමින් අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සඳහන් කළේ පුද්ගලයෙකු අත්අඩංගුවට ගැනීම, ප්‍රකාශ සටහන් කරගැනීම සහ අධිකරණයට ඉදිරිපත් කිරීම යන කාරණා විමර්ශනයකින් සතු අභිමතානුසාරී බලයක් බවයි.
අභිමතානුසාරී බලයක් ක්‍රියාත්මක කරන ලෙස රිට් ආඥාවක් නිකුත් කිරීමට හැකියාවක් නොමැති බවයි විනිසුරුවරයා සඳහන් කළේ.
ඒ, අනුව බැලූ බැල්මට ම මෙම පෙත්සම හරහා නඩු නිමිත්තක් අනාවරණය නොවන හෙයින් වග උත්තර කරුවන් විසින් ඉදිරිපත් කළ මූලික විරෝධතා පිළි ගනිමින් අදාළ පෙත්සම ගාස්තුවට යටත්ව නිෂ්ප්‍රභ කරන බවත් විනිසුරුවරයා සඳහන් කළා.
නීතිඥවරයෙකු වන රාමලිංගම් රන්ජන් විසින් මෙම පෙත්සම ඉදිරිපත් කර තිබුණා.
පෙත්සම්කරු කියා සිටින්නේ ඉකුත් මැයි මස 09 වන දා ගාලුමෝදර පැවැති ගෝඨා ගෝ ගම අරගලයට පහරදීමේ සිද්ධියේ සැකකරුවකු වශයෙන් බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් නම් කිරීමට ප්‍රමාණවත් සාක්ෂි ඉදිරිපත් ව තිබියදීත් නීතිපතිවරයා සහ අපරාධ පරීක්ෂණ දෙපාර්තමේන්තුව එම කටයුත්ත මඟ හරිමින් සිටින බවයි.
එබැවින් දේශබන්දු තෙන්නකෝන් අදාළ සිද්ධියේ සැකකරුවකු වශයෙන් නම් කොට අත්අංඩගුවට ගෙන, ප්‍රකාශ සටහන් කර ගෙන අධිකරණයට ඉදිරිපත් කරන ලෙස නීතිපතිවරයාට සහ අපරාධ පරීක්ෂණ දෙපාර්තමේන්තුවේ අධ්‍යක්ෂවරයා ඇතුළු නිලධාරීන්ට රිට් ආඥාවක් නිකුත් කරන ලෙස ඉල්ලමින් මෙම පෙත්සම ඉදිරිපත් කර තිබුණා.
