ගෑනියෙක් නිසා තාත්තයි පුතයි මරා ගෙන

හේනේ පැලේදී පුතාගේ බිරියට තාත්තා අයුතු යෝජනා කළාලු

ජම්බුගහපිටිය, මන්දණ්ඩාවෙල ප්‍රදේශයේ පදිංචි පිය පුතු දෙපළක් ආරවුලක් මුල්කරගෙන පිහියකින් එකිනෙකාට ඇනගෙන ඇතැයි කටුගස්කොට පොලිසිය පැවසීය.

එම පියා විසින් පුතුගේ බිරිඳට අයුතු යෝජනාවක් කිරීම සහ ඉඩම් ආරවුලක් මෙම ගැටුමට හේතු වී ඇතැයි ද පොලිසිය කීවේය.

තම පියා විසින් තමාට පිහියකින් කෙටු බවට පුතා විසින් කටුගස්තොට පොලිසියට පැමිණිලි කර ඇති අතර, තම පුතා තමා පසු පස පන්නා තමාට පිහියකින් කෙටු බවට පියා විසින් ද පොලිසියට පැමිණිලි කර ඇත.

විමර්ශන වලින් අනතුරුව කටුගස්තොට පොලිසියේ අපරාධ විමර්ශන අංශයේ නිලධාරින් විසින් සැකකාර පිය පුතු දෙදෙනා අත්අඩංගුවට ගෙන තිබේ.

පුතා නිතරම මහගෙදර ඔහුගේ නමට ලියා දෙන ලෙස තමාගෙන් කරනු ලබන ඉල්ලීම ඉවසාගත නොහැකිව හේනේ තැනු පැලක ජීවත්ව සිටි බවත් එසේ පැලේ සිටියද තමා පුතාට සලකන බවත් එම පියා පොලිසියට පවසා ඇත. තමාට අයත් ත්‍රිරෝද රථය පාවිච්චි කරනන්නේද පුතා බවද හෙතෙම වැඩිදුරටත් පොලිසියට පවසා තිබේ.

මේ අතර, පුතා පොලිසියට පවසා ඇත්තේ තම බිරිඳ පියාට ආහාර රැගෙන හේනේ පැලට ගිය අවස්ථාවේ ඇයට අයුතු යෝජනාවක් කළ නිසා ඔහු සමග ආරවුලක් ඇතිකරගත් බවයි.

අත්ඩංගුවට ගත් සැකකරුවන් පෙරේදා (9 වැනිදා) මහනුවර මහෙස්ත්‍රාත් අධිකරණයට ඉදිරිපත් කිරීමෙන් පසු රුපියල් ලක්ෂ 2 බැගින්වූ ශරීර ඇප මත මුදාහැර ඇති අතර, වැඩිදුර විභාගය ඔක්තෝබර් 5 වැනිදා පැවැත්වීමට නියමිතය.

විජේරත්න හල්ඔලුව – හාරිස්පත්තුව