කොළඹ – කටුනායක අධිවේගී මාර්ගයේ ගාස්තු ගෙවීම මුදල් හෝ කාඩ්පත් මගින් මෙන්ම ETC (Electronic Toll Collection) මගින් සිදුකිරීමේ දී සේවාව ලබාගැනීම තව දුරටත් පහසු කිරීමට මහාමාර්ග සහ ප්රවාහන අමාත්යාංශය පියවර ගෙන තිබෙනවා.
ඒ අනුව එම අධිවේගී මාර්ගයේ ගාස්තු ගෙවීම මුදල් හෝ කාඩ්පත් මගින් මෙන්ම ETC මගින්ද සිදුකිරීමේ පහසුකම් ලබාදී ඇති අතර ETC පහසුකම් භාවිත කරන්නන් සඳහා ඇතුළුවීමට සහ පිටවීමට වෙන්වූ වෙනමම ස්ථානයක් ස්ථාපිත කර තිබෙනවා.
එය භාවිතකර ප්රමාදයකින් තොරව ඇතුළුවීමේ සහ පිටවීමේ පහසුකම් ද සලසා දී ඇති බවයි මහාමාර්ග සහ ප්රවාහන අමාත්යාංශය සඳහන් කළේ.
මේ අතර ETC පහසුකම් භාවිත කරන්නන්ට සෑම ගමන් වාරයක් සඳහාම නියමිත ගාස්තුවෙන් 10% ක වට්ටමක් ද හිමිවනවා.
මේ වනවිට පෑලියගොඩ, කෙරවලපිටිය, ජා ඇල සහ කටුනායක හුවමාරු මධ්යස්ථානවලදී ETC මගින් ගෙවීම් කල හැකියි.
www.exway.rda.gov.lk වෙබ් අඩවිය හරහා ඉතා පහසුවෙන් ETC සදහා ලියාපදිංචි වීමට මේ වනවිට පහසුකම් සලසා දී තිබෙනවා.
මේ අතර අවහිරතාවයකින් තොරව ETC පහසුකම භාවිත කිරීම සඳහා ඇතුළුවීමේ සහ පිටවීමේ ස්ථානවලදී පැයට කිලෝමීටර් 15ක වේගයක් පවත්වා ගන්නා ලෙසත්, ඉදිරියෙන් ඇති වාහනය සමග මීටර් 20ක පරතරයක් තබාගැනීමට කටයුතු කරන ලෙසත් මාර්ග සංවර්ධන අධිකාරිය රියදුන්ට දැනුම් දෙනවා.
