කොරියානු රැකියා සඳහා ශ්රමිකයින් රැගෙන යන ශ්රී ලංකන් ගුවන් සේවයට අයත් ගුවන් යානා ප්රමාදවීම හේතුවෙන්
ශ්රමිකයින් කොරියාවට යැවීමට නොහැකිවීමේ ගැටලුවට ස්ථිර විසදුමක් අමාත්ය මනුෂ නානායක්කාර විසින් ලබාදී තිබෙනවා.
ඊයේ දිනයේත් මෙම ගුවන් යානා ප්රමාදය හේතුවෙන් ශ්රමිකයින් කොරියාවට යැවීමට නොහැකිවීමේ ගැටලුවක් පැන නැගුණා.
අමාත්යවරයා සඳහන් කළේ කොරියාව හා ලංකාව අතර සෘජු ගුවන් ගමන් සේවා ආරම්භ කිරීමට කොරියානු රජය සමග සාකච්ඡා කර ඇති බවයි.
තවත් මාස දෙකක් වැනි කාලයක් තුළදී කොරියානු රැකියා සදහා යන ශ්රමිකයින් කොරියානු ගුවන් සේවය හරහා සෘජුවම කොරියාවට යැවිමට කටයුතු කරන බව අමාත්යවරයා පාර්ලිමේන්තුවේදී ප්රකාශ කළා.
වැඩිදුරටත් අදහස් දැක්වූ අමාත්යවරයා….
කොරියනු ගුවන් ප්රමාදය වගේම අනෙක් ගුවන් යානා ප්රමාදයත් රැකියා සදහා ශ්රමිකයින් භාරගැනීමේදී ගැටලු ඇති වෙනවා. මීට පෙර මේ ආකාරයට කොරියානු රැකියා සදහා ශ්රමිකයින් රැගෙන යන ගුවන් යානය අවස්ථා තුනකදී ප්රමාද වුණා. සමහර අවස්ථාවලදී ශ්රමිකයින් පිටත් කර යැවීමටත් නොහැකි වුණා. කොරියාවේදී අපේ ශ්රමිකයින් භාර ගන්නේ ඒ රටේ වේලාවෙන් උදෑසන අටත් නමයත් අතර කාලයේදී. ඒ වෙලාවෙන් පිට යනවා නම් භාරගැනීමට සූදානම් නෑ.
ඊයේ දවසේදී මේ දරුවන් සියලුම බලාපොරොත්තු පොදි බැදගෙන ගුවන් තොටුපොලට යන්න සූදානම් වෙලා තිබුණේ. ඊයේ මේ යන්න සූදානම් වෙලා තිබුණේ කොරියාවට යන අටසිය වැනි කණ්ඩායමයි. අනෙක් කණ්ඩායම් ළඟට නොගියත් අටසිය වැනි කණ්ඩායම ළඟට ගිහින්, සුබපතලා, සියල්ල සූදානම් කරන විට ගුවන් යානා ප්රමාද වෙනවා.
ශ්රී ලංකන් ගුවන් සේවය මේ ආකාරයට දිගින් දිගටම ප්රමාද වෙන නිසා මෙයට විසඳුමක් විදියට අපි කොරියානු රාජ්ය සමග සාකච්ඡා කරලා ඉදිරියට කොරියන් ගුවන් සේවය නැවත වරක් ලංකාව සමග ගුවන් ගමන් ආරම්භ කිරීමට බලාපොරොත්තු වෙනවා. තවත් මාස දෙකක් වැනි කාලයක් ඇතුළතදී කොරියාව හා ලංකාව අතර සෘජු ගුවන් ගමන් ආරම්භ කිරීමට බලාපොරොත්තු වෙනවා. නමුත් දැනට තාවකාලිකව තව සුමාන දෙකක් තුළ සිංගප්පූරුව හරහා ශ්රමිකයින් යැවීමට කටයුතු කරනවා. සිංගප්පූරුව දක්වා ශ්රී ලංකන් ගුවන් සේවයෙන් ගිහිල්ලා එතැන් සිට කොරියන් එයාර් ගුවන් යානයකින් කොරියාවට යැවීමට බලාපොරොත්තු වෙනවා. එතකොට ලංකාවේ සිට සිංගප්පූරුවට යන ගුවන් යානා ප්රමාද වුවත්, සිංගප්පූරුවේ සිට කොරියාව බලා ගුවන් ගමන් කිහිපයක් තිබෙන නිසා එය කළමනාකරණය කරගත හැකියි.
තවත් මාසයකින් පමණ පසුව කොරියානු ගුවන් සේවය ආරම්භ කළ පසුව සෘජුව මෙම ශ්රමිකයින් කොරියන් ගුවන් සේවය හරහා කොරියාව බලා යැවීමට කටයුතු කරනවා.
කොළඹ සිට කොරියාව බලා ගමන් ගන්නා ගුවන් යානය පවත්වාගෙන යන්නේම කොරියාව බලා යන ශ්රමිකයන් නිසා. නමුත් නිර්ලජ්ජිත ලෙස දිගින් දිගටම මෙම ගුවන් යානය ප්රමාද කරනවා. කොතරම් කිව්වත් ඒක බීරි අලින්ට වීනා වාදනය කරනවා වගේ. කොයිම ආකාරයකින්වත් කිසිම තැකීමක් කරන්නේ නෑ.
