2015 ජනාධිපතිවරණය සමයේ දේශපාලන ක්‍රියාකාරකම් සඳහා ශ්‍රී ලංකා රූපවාහිනී සංස්ථාවට අයත් රුපියල් 990,000ක මුදලක් වැය කර GI බට මිල දී ගැනීමෙන් රජයට පාඩු සිදු කළ බවට චෝදනා කර හිටපු ඇමැති කෙහෙළිය රඹුක්වැල්ල මහතා ඇතුළු තිදෙනකුට එරෙහි පවරා ඇති නඩුවේ වැඩිදුර සාක්ෂි විභාගය ලබන ජනවාරි 27 වැනිදා කැඳවීමට කොළඹ මහාධිකරණ විනිසුරු නවරත්න මාරසිංහ මහතා නියෝග කර තිබෙනවා.
දසත අධිකරණ වාර්තාකරු පැවසුවේ පසුගිය ඔක්තෝබර් 27 වැනිදා විත්තිකරුවන් හට චෝදනා කියවා දිමෙන් අනතුරුව නීතිපතිවරයා ගොනුකර ඇති චෝදනා 4ටම නිවැරැදිකරුවන් බව විත්තිකරුවන් මෙහිදී කියා සිටි බවයි.
ඒ අනුව මහාධිකරණ විනිසුරුවරයා විසින් එහි සාක්ෂි කැඳවීමට නියම කරනු ලැබුවා.
අද (26) නඩුවේ පැමිණිල්ලේ සාක්ෂි විභාගය ආරම්භ වූ අතර වැඩිදුර සාක්ෂි විභාගය ලබන ජනවාරි 27 දක්වා කල් තැබීමට නියෝග මහාධිකරණ විනිසුරුවරයා නියම කළා.
2015 වසරේ සිට රූපවාහිනී සංස්ථාවේ අලෙවි අධ්‍යක්ෂවරයා ලෙස කටයුතු කළ සනත් ප්‍රියන්ත දළුවත්ත මහතා සාක්ෂි දුන්නා.
2014 වසරේ නොවැම්බර් 25 වැනි දා හෝ ඊට ආසන්න දිනෙක ජනමාධ්‍ය ඇමතිවරයා ලෙස කටයුතු කරමින් රූපවාහිනී සංස්ථාවට අත්‍යවශ්‍ය නොවන අවස්ථාවක එහි ප්‍රවර්ධන වැඩසටහනක් සඳහා යැයි කියමින් රුපියල් 9,90,000ක මුදලක් වැය කර රූපවාහිනී සංස්ථාවට GI පයිප්ප බට 600ක් මිල දී ගැනීමෙන් රජයට පාඩු සිදු කිරීම, ඒ සඳහා ආධාර අනුබලදීම යටතේ අල්ලස් පනතේ ‘දූෂණය’ නමැති වරද කළ බවට චෝදනා කර අල්ලස් කොමිසම මෙම නඩුව ගොනු කර තිබෙනවා.
අල්ලස් හා දූෂණ පනත සහ දණ්ඩ නීති සංග්‍රහය යටතේ අධිචෝදනා 4ක් යටතේ විත්තිකරුවන්ට එරෙහිව චෝදනා ගොනු කර තිබෙන අතර අධිචෝදනා පත්‍රයේ පැමිණිල්ලේ සාක්ෂිකරුවන් 26 දෙනෙකු හා ලේඛන 17ක් සාක්ෂි ලෙස ඉදිරිපත් කර ඇති බවත් වාර්තා වනවා.
රූපවාහිනී සංස්ථාවේ හිටපු අධ්‍යක්ෂ ජනරාල් චන්ද්‍රපාල ලියනගේ හා එහි හිටපු සභාපති විමලසේන රූබසිංහ යන මහත්වරු මෙම නඩුවේ සෙසු විත්තිකරුවන්.
අල්ලස් හෝ දූෂණ කොමිසමේ සහකාර අධ්‍යක්ෂ ජනරාල් අනුරාධා සිරිවර්ධන මහත්මිය පැමිණිල්ල මෙහෙය වනු ඇති.
