කූඨ ලෙස සකස් කළ ව්‍යාජ ජර්මානු වීසා බලපත්‍ර උපයෝගී කරගෙන යුරෝපය වෙත පැන යාමට තැත් කළ ශ්‍රී ලාංකිකයන් දෙදෙනෙකු අද (26) උදෑසන කටුනායක ගුවන් ආගමන විගමන දෙපාර්තමේන්තුවේ නිලධාරීන් පිරිසක් විසින් අත්අඩංගුවට ගනු ලැබුවා.
දසත ගුවන්තොටුපොළ වාර්තාකරු පැවසුවේ; මෙම සැකකරුවන් වව්නියාව නගරය අවට පදිංචිකරුවන් බවත් 26 හැවිරිදි තරුණයෙක් සහ 24 හැවිරිදි තරුණියක් මේ අතර සිටින බවයි.
ඔවුන් දෙදෙනා අද උදෑසන 07.10 ට ඉන්දියාවේ නවදිල්ලි නුවර ඔස්සේ නෙදර්ලන්තයේ ඇම්ස්ටර්ඩෑම් නුවර බලා පිටත්ව යාම සඳහා ඉන්දීය ගුවන් සේවයේ ඒ.අයි.- 281 දරන ගුවන් යානයට පිවිසීමට කටුනායක ගුවන් තොටුපොළ වෙත පැමිණ තිබුණා.
සැකකරුවන් දෙදෙනා ගුවන් සේවා නිශ්කාශන කටයුතු නිමා කර, විගමන කටයුතු සඳහා අවශ්‍ය ලියකියවිලි ද රැගෙන යමින් සිටියදී , ආගමන විගමන දෙපාර්තමේන්තු දේශසීමා ආවේක්ෂණ ඒකකයේ නිලධාරීන් , මොවුන් දෙදෙනාගේ ලියකියවිලි තාක්ෂණික පරීක්ෂා කිරීම් සිදු කිරීමට යොමු කෙරුණා.
එහිදී ඔවුන් සන්තකයෙහි පැවති ජර්මානු වීසා බලපත්‍ර කූඨ ලෙස සකස් කර ඇති බවත්, ඊට අමතරව මොවුන්ගේ ගමන් බලපත්‍රය තුළ ඇති ශ්‍රී ලංකා සහ ජර්මානු මුද්‍රා සියල්ල ව්‍යාජ ඒවා බවත් අනාවරණය වී තිබෙනවා.
පසුව මොවුන්ගෙගෙන් සිදු කළ ප්‍රශ්න කිරීම්වල දී තරුණයාගේ වීසා බලපත්‍රය නෝර්වේ ජාතිකයෙකු විසින් ද තරුණියගේ වීසා බලපත්‍රය ඇයගේ මව විසින් ද සකස් කර දී ඇති බව, ආගමන විගමන දෙපාර්තමේන්තු දේශසීමා ආවේක්ෂණ ඒකකයේ නිලධාරීන් හමුවේ ප්‍රකාශ කර තිබුණා.
ඒ අනුව අත්අඩංගුවට ගත් මොවුන් දෙදෙනා මේ පිළිබඳ වැඩිදුර විමර්ශන කටයුතු සඳහා කටුනායක ගුවන් තොටුපොළ අපරාධ පරීක්ෂණ දෙපාර්තමේන්තු නිලධාරීන් වෙත භාරදීමට පියවර ගෙන තිබෙනවා.
