කැනඩාවේ රැකියා සඳහා යවන බව පවසා කෝටි හතකට ආසන්න මුදලක් වංචා කළැයි කියන සිද්ධියක් සම්බන්ධයෙන් රක්ෂිත බන්ධනාගාරගත කර සිටින ආනන්ද අබේරත්න වෛද්‍යවරයාට ඇප දීම කොළඹ ප්‍රධාන මහේස්ත්‍රාත් තිළිණ ගමගේ මහතා ප්‍රතික්ෂේප කර තිබෙනවා.
සැකකරුට එරෙහිව පැමිණිලි 100කට අධික ප්‍රමාණයක් ලැබී ඇති බවට කොළඹ වංචා විමර්ශන කොට්ඨාසය ඉදිරිපත් කළ කරුණු සලකා බැලීමෙන් අනතුරුව ප්‍රධාන මහේස්ත්‍රාත්වරයා විසින් ඊයේ (27) මෙම නියෝගය නිකුත් කළා.
සැකකාර වෛද්‍යවරයා වෙනුවෙන් පෙනී සිටි නීතිඥවරයා ඇප දෙන ලෙස අධිකරණයෙන් ඉල්ලා සිටි අවස්ථාවේ ජනතාවගෙන් ගෙන තිබෙන සියලු මුදල් ගෙවා නිම කළ පසු ඇප දීමට සලකා බලන බව මහේස්ත්‍රාත්වරයා දැනුම්දුන්නා.
සැකකරුගෙන් කටඋත්තර ගැනීමට අවශ්‍ය ප්‍රතිපාදන වංචා විමර්ශන කොට්ඨාසයට දෙන ලෙස ද මහේස්ත්‍රාත්වරයා බන්ධනාගාර නිලධාරීන්ට නියෝග කළා.
ඒ අනුව සැකකාර වෛද්‍යවරයා ලබන 11 වැනිදා දක්වා යළි රක්ෂිත බන්ධනාගාරගත කරන ලෙසයි අධිකරණය නියෝග නිකුත් කළේ.
ජාඇළ ප්‍රදේශයේ පදිංචි ශ්‍රියානි මනම්පේරි නමැති නීතිඥවරියක ද මේ සිද්ධිය සම්බන්ධයෙන් අත්අඩංගුවට ගෙන අධිකරණයට ඉදිරිපත් කර තිබූ අතර, ඇයට පෙර නඩු වාරයේ දී අධිකරණයෙන් ඇප නියම කෙරුණා.
සැකකාර පාර්ශ්වය වෙනුවෙන් නීතිඥ ජගත් අබේනායක මහතා අධිකරණයේ පෙනී සිටි බවයි වාර්තා වන්නේ.
