කාරක සභා කිහිපයකට සාමාජිකයන් පත් කෙරේ

නව වන පාර්ලිමේන්තුවේ හතරවන සැසිවාරයේ ආරම්භයත් සමග කාරක සභා කිහිපයක් සඳහා සාමාජිකයන් පත්කර තිබෙනවා.

ඒ රජයේ මුදල් පිළිබඳ කාරක සභාව සහ පාර්ලිමේන්තු කටයුතු පිළිබඳ කාරක සභාව (COPA) සඳහා යි.

නව වැනි පාර්ලිමේන්තුවේ සිව්වැනි සභා වාරයේ රජයේ මුදල් පිළිබඳ කාරක සභාවේ සේවය කිරීම නම් කරන ලද සාමාජික මන්ත්‍රී නාමලේඛනය කථානායක මහින්ද යාපා අබේවර්ධන අද පාර්ලිමේන්තුවට ඉදිරිපත් කළා.

පාර්ලිමේන්තුවේ ස්ථාවර නියෝග 121 හි විධිවිධාන සහ අද දින පාර්ලිමේන්තුව විසින් සම්මත කරන ලද යෝජනාව අනුවයි, රජයේ මුදල් පිළිබඳ කාරක සභාවේ සේවය කිරීම සඳහා, මෙම මන්ත්‍රීවරුන්ගේ නම් තේරීම් කාරක සභාව විසින් නම් කර ඇත්තේ.

ඒ අනුව, විදුර වික්‍රමනායක, නලින් ප්‍රනාන්දු, ශෙහාන් සේමසිංහ, ප්‍රමිත බණ්ඩාර තෙන්නකෝන්, සීතා අරඹේපොල, සුරේන් රාඝවන්, අනුප පස්කුවල්, ජොන්ස්ටන් ප්‍රනාන්දු, වජිර අබේවර්ධන, මහින්දානන්ද අලුත්ගමගේ, දුමින්ද දිසානායක, නිමල් ලාන්සා, යූ. කේ. සුමිත් උඩුකුඹුර, ඉසුරු දොඩන්ගොඩ, නීතිඥ ප්‍රේම්නාත් සී. දොලවත්ත, එම්. ඩබ්ලිව්. ඩී. සහන් ප්‍රදීප් විතාන, මධුර විතානගේ, රංජිත් බණ්ඩාර යන මහත්ම මහත්මීන් රජයේ මුදල් පිළිබඳ කාරක සභාවේ සමාජිකයන් ලෙස නම් කර තිබෙනවා.

රජයේ මුදල් පිළිබඳ කාරක සභාව පාර්ලිමේන්තු තේරීම් කාරක සභාව විසින් පත්කරනු ලැබ ඇතත් එම කමිටුවේ මෙයට පෙර සභාපති ධූරය දැරූ සමගි ජන බලවේගය පක්ෂයේ මන්ත්‍රී ආචාර්ය හර්ෂ ද සිල්වා මහතා එහි සාමාජිකයකු වශයෙන් හෝ පත් කර නොතිබීම විශේෂත්වයක්.

මේ අතර පාර්ලිමේන්තු කටයුතු පිළිබඳ කාරක සභාව (COPA) සඳහා ද සාමාජික මන්ත්‍රීවරයන් නම්‍ කිරීම අද සිදු කෙරුණා.

නම් කරන ලද සාමාජික මන්ත්‍රී නාමලේඛනය කථානායක මහින්ද යාපා අබේවර්ධන විසිනුයි පාර්ලිමේන්තුවට ඉදිරිපත් කරනු ලැබුවේ.

පාර්ලිමේන්තුවේ ස්ථාවර නියෝග 115 හි විධිවිධාන සහ අද දින පාර්ලිමේන්තුව විසින් සම්මත කරන ලද යෝජනාව අනුව, කථානායකවරයා සභාපතිවරයා ලෙසද, නියෝජ්‍ය කථානායකවරයා, නියෝජ්‍ය කාරක සභා සභාපතිවරයා, පාර්ලිමේන්තුවේ සභානායකවරයා, විරුද්ධ පාර්ශ්වයේ නායකවරයා, ආණ්ඩු පාර්ශ්වයේ ප්‍රධාන සංවිධායකවරයා සහ විරුද්ධ පාර්ශ්වයේ ප්‍රධාන සංවිධායකවරයා සමඟ පාර්ලිමේන්තු කටයුතු පිළිබඳ කාරක සභාවේ සේවය කිරීම සඳහා මෙම මන්ත්‍රීවරුන් තේරීම් කාරක සභාව විසින් නම් කර තිබෙනවා.

ඒ අනුව පාර්ලිමේන්තු මන්ත්‍රීවරුන් වන නිමල් සිරිපාල ද සිල්වා, නීතිඥ පවිත්‍රා වන්නිආරච්චි, ඩග්ලස් දේවානන්දා, මහින්ද අමරවීර, ජනාධිපති නීතිඥ එම්. යූ. එම්. අලි සබ්රි, කංචන විජේසේකර, නසීර් අහමඩ්, චමල් රාජපක්ෂ, ජොන්ස්ටන් ප්‍රනාන්දු, ගාමිණී ලොකුගේ, වජිර අබේවර්ධන, සී. බී. රත්නායක, රෝහිත අබේගුණවර්ධන, නාමල් රාජපක්ෂ, සාගර කාරියවසම් යන මහත්ම මහත්මීනු යි පාර්ලිමේන්තු කටයුතු පිළිබඳ කාරක සභාවේ සේවය කිරීම සඳහා පත් කර ඇත්තේ.

නවවැනි පාර්ලිමේන්තුවේ තුන්වෙනි සභාවාරය වාර අවසාන කිරීමත් සමග රජයේ මුදල් පිළිබඳ කාරක සභාව මෙන්ම පාර්ලිමේන්තු කටයුතු පිළිබඳ කාරක සභාව අහෝසි වුණා.

ඒ අනුවයි ඊට නව සාමාජිකයන් පත් කිරීම සිදු කෙරුණේ.