ශ්‍රී ලංකා ක්‍රිකට් කණ්ඩායමේ වත්මන් පුහුණුකරු ලෙස කටයුතු කරන මීකි ආතර් මෙම සිය දෙවසරක පුහුණුකාර ධුරයෙන් පසුව සමුදීමට තීරණය කර ඇති බව වාර්තා වනවා.
වාර්තා වන පරිදි මීකි ආතර් එංගලන්තයේ ඩර්බිෂයර් ප්‍රාන්ත කණ්ඩායමේ ප්‍රධාන පුහුණුකාර ධුරයට තෝරා පත්කරගෙන ඇති අතර ලබන මාසය අවසානයේදී ඔහු ශ්‍රී ලංකාවෙන් නික්ම යෑමට නියමිතව ඇත.
ශ්‍රී ලංකා ක්‍රිකට් කණ්ඩායමේ අසිරූ අවදියක පසුවෙමින් තිබියදී කණ්ඩායමේ ප්‍රධාන පුහුණුකාර ධුරයට පත්වූ ඔහු සෙමින් වුවත් ඉතා සැලසුම් සහගතව කඩා වැටී තිබු ශ්‍රී ලංකා ක්‍රිකට් කණ්ඩායමේ නැවත ගොඩනැගීම සඳහා ඉමහත් සේවයක් සිදුකරනු ලැබුවා.
එහි ප්‍රථිපලයක් ලෙස ශ්‍රී ලංකා ක්‍රිකට් කණ්ඩයම ටෙස්ට්, එක්දින සහ විස්සයි 20 කණ්ඩායම් පසුගිය මාස කිහිපයේදී දස්කම් දැක්වීමට සමත්වූ අතර මෙවර විස්සයි 20 ලෝක කුසලාන තරගාවලියේ දී ජාත්‍යන්තර විචාරකයින් පවා මවිත කිරීමට සමත්වූවා.
ඒ පළමු වරට ලෝක කුසලාන තරගාවලියක් සඳහා ක්‍රීඩා කිරීමට පැමිණි කෝඩුකාරයින් 08 දෙනෙකුගෙන් යුත් කණ්ඩායමක් ලෙස සැලකු ශ්‍රී ලංකාව දකුණු අප්‍රිකාව, එංගලන්තය සමග පැවති තරග පරාජයට පත්වුවද ඔවුනට දැඩි පීඩනයක් එල්ල කරමින් සටන්කාමි ක්‍රීඩා විලාශයක් පෙන්නුම් කිරීම නිසයි.
ශ්‍රී ලංකා කණ්ඩායමේ නැවත නගා සිටුවීමේ ක්‍රියාවලියේදී ප්‍රධාන පුහුණුකරු ලෙස මීකි ආතර් ඉතා වැදගත් භූමිකාවක් රඟ දැක්වූ අතර ඔහුගේ කාල සීමාවේදී තරුණ ක්‍රීඩකයින් වැඩි වශයෙන් කණ්ඩායමට යොදා ගනිමින් විවිධ අත්හදා බැලීම් සිදුකිරීමේ ප්‍රථිපල දැන් ලැබෙමින් පවතිනවා.
