කටුනායක ආයෝජන කලාපයේ කර්මාන්තශාලාවක ගින්නක්

කටුනායක ආයෝජන කලාපයේ කර්මාන්තශාලාවක ගින්නක් හටගෙන තිබෙනවා. ගින්න පාලනය කිරීම සඳහා මේවනවිට ගිනි නිවන රථ 07ක් යොදවා ඇති බව පොලිසිය පවසනවා.

Update 02/03/2021 10.36AM

කටුනායක ආයෝජන ප්‍රවර්ධන කලාපයේ කර්මාන්ත ශාලාවක ඇති වු ගින්න මේ වනවිට මැඩපවත්වා තිබේ. 

අපද්‍රව්‍ය ප්‍රතිචක්‍රීකරණය සිදුකරන කර්මාන්ත ශාලාවක අද (03) උදෑසන මෙම ගින්න හටගෙන තිබුණි.

ඒ අනුව ගින්න මැඩපැවැත්වීමේ කටයුතු සඳහා ගිනි නිවීමේ ඒකකය, මීගමුව නගර සභාව, පොලීසිය මෙන්ම ගුවන් හමුදාව ද එක්වු බව කටුනායක පොලීසිය පැවසීය.

එම කටයුතු සඳහා ගිනි නිවීමේ රථ 08ක් යොදාගත් බව ද පොලීසිය සඳහන් කළේය.

අපද්‍රව්‍ය ප්‍රතිචක්‍රීකරණ කර්මාන්ත ශාලාවේ කසළ පිළිස්සුම් ස්ථානයකින් ගින්න හටගෙන ඇති බවට සිදුකළ මූලික විමර්ශන වලදී අනාවරණය වී තිබේ.

ගින්නෙන් පසුව අදාළ කර්මාන්ත ශාලාවේ සේවකයින් 30 දෙනෙකු මීගමුව රෝහලට ඇතුළත් කර තිබේ.

මීගමුව රෝහලේ අධ්‍යක්ෂ එන්. ලෝගනාදන් මහත්මිය Gossiplankanews.lk වෙබ් අඩවියට පැවසුවේ, ගින්නෙන් පසුව ඇති වූ ශ්වසන අපහසුතා හේතුවෙන් මෙම සේවකයින් රෝහල් ගත කර ඇති බව ය. 

කෙසේවෙතත්, රෝහල් ගත කළ සේවකයින්ගේ තත්ත්වය බරපතළ නොවන බවත් ඔවුන් මේ වන විට රෝහලේ හදිසි ප්‍රතිකාර ඒකකයට ඇතුළත් කර ඇති බවත් මීගමුව රෝහලේ අධ්‍යක්ෂවරිය පැවසීය.