“ඒහිපස්සිකෝ” සාම පා ගමන නිමා කළ භික්ෂුන් වහන්සේලා දිවයිනෙන් පිටත්ව යයි

ශ්‍රී ලංකාවේ ” ඒහිපස්සිකෝ ” ලෙස නම් කර තිබූ ” ලෝක සාමය සදහා පාගමන” (A Global Walk for Peace) නැමති සාම පා ගමන සදහා සහභාගී වීම සදහා මෙරටට පැමිණ සිටි, ඇමෙරිකාවේ වාසය කරන වියට්නාම් ජාතික පඤ්ඤාකර සහ රතනගුණ ඇතුළු භික්ෂුන් වහන්සේලා පිරිසක් සමග  “ආලෝකා ” නැමති සුනඛයා ද , තවත් ගිහි පිරිසක් ද , එම සාම පාද චාරිකාව නිමා කර , අද (29) දින උදෑසන කටුනායක ගුවන් තොටුපොළෙන් පිටත්ව ගියා .

මෙම භික්ෂුන් වහන්සේලා පිරිස අද දින අලුයම කටුනායක ගුවන් තොටුපොළ විශේෂ අමුත්තන්ගේ මැදිරිය වෙත පැමිණි අතර ඔවුන් වෙත සංග්‍රහ සත්කාර කිරීමෙන් පසු, ගුවන් තොටුපොළ විවිධ අංශ වල සේවයේ නිරත සේවක –  සේවිකාවන් පැමිණ , නමස්කාර කිරීම ද සිදු කළා.

 “ආලෝකා” සුනඛයා වෙනුවෙන් පශු වෛද්‍යවරුන් , ගුවන් තොටුපොළ පොලිස් නිලධාරීවරුන් සහ ගුවන් හමුදා නිලධාරීන් ද විශේෂ අවධානයක් යොමු කර කටයුතු කර තිබෙනවා.

මෙම භික්ෂුන් වහන්සේලා පිරිස අද දින උදෑසන 07.12ට  තුර්කියේ ඉස්තාන්බුල් නුවර බලා, තුර්කි ගුවන් සේවයේ ටී.කේ.- 731 දරන ගුවන් යානයෙන් , කටුනායක ගුවන් තොටුපොළෙන් පිටත්ව ගිය අතර ඔවුන් එතැන් සිට තවත් වෙනත් ගුවන් යානයකින් ඇමෙරිකාව බලා පිටත්ව යාමට නියමිතයි.