උපයන විට බදු ගෙවීම සිදුකරන ජනතාවට ද යම් යම් අපහසුතාවලට මුහුණ දීමට සිදුව තිබුණත් නිදහස් අධ්යාපනය යටතේ ඉගෙන ගත් උගත් පිරිසක් ලෙස එම පිරිසට ද රටෙන් අඩක් පමණ වූ දුක්විඳින ජනතාව දෙස හා ඔවුනගේ ගැටළු දෙසත් අවධානය යොමු කිරීමේ යුතුකමක් මෙන්ම වගකීමක් ද පවතින බව මුදල් රාජ්ය අමාත්ය රංජිත් සියඹලාපිටිය පවසනවා.
දෙහිඕවිට, කනන්ගම ප්රදේශයේ පැවති වැඩසටහනකින් අනතුරුව මාධ්ය වෙත අදහස් දක්වමින් ඔහු මේ බව සඳහන් කළා.
මෙහිදී වැඩිදුරටත් අදහස් දැක් වූ රාජ්ය අමාත්යවරයා,
“රට දැඩි ආර්ථික අර්බුධයකට මුහුණ දී ඉන් ගොඩ එමින් සිටින අවස්ථාවක්. එසේ අර්බුධයක් ඇති වීමට ප්රධාන හේතුවක් වූයේ අපි විසින්ම අපේ බදු අඩුකර ගැනීමයි. උපයන විට බද්දත් කලින් සිට පැවති බද්දක්. නමුත් පෙරකී බදු අඩු කිරීම හේතුවෙන් ලිපිගොනු ලක්ෂ 15ක් පමණ අවලංගු වුණා. මේ සිදුකරන්නේ නැවත එම බදු ඇති කිරීමයි. රටේ පවතින අමාරුකම් නිසා කලින් පැවති සීමාවන් තරමක් උඩට ගෙන තිබෙනවා.රටේ ශ්රමික ජනතාව ලක්ෂ 46ක් පමණ සිටිනවා. ඔවුන්ගෙන් 120000ක්, එනම් 2.6 %ක් තමයි රුපියල් ලක්ෂයට වැඩියෙන් වැටුප් ලබන්නේ. එයිනුත් 43 % ක් රුපියල් ලක්ෂයත් , ලක්ෂ එකහමාරත් අතර වැටුප් ලබන පිරිස, රුපියල් එක්ලක්ෂ පනස් දහසක වැටුපක් ලබාගන්නා අයෙක් මාසිකව ගෙවන බදු මුදල රුපියල් 3000 ක්.”
