ආහාර ප්රතිපත්ති සහ සුරක්ෂිතතා කමිටුවේ රැස්වීමක් කෘෂිකර්ම, පශු සම්පත්, ඉඩම් සහ වාරිමාර්ග අමාත්ය ලාල් කාන්ත, වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්ය වසන්ත සමරසිංහ යන අයගේ ප්රධානත්වයෙන් ඊයේ (08) පස්වරුවේ ජනාධිපති කාර්යාලයේදී පැවැත් වුණා.
ඉදිරියේ දී ගෝලීය වශයෙන් ඇති විය හැකි එල්-නිනෝ තත්ත්වය හමුවේ ශ්රී ලංකාවට බලපෑමක් ඇති වුවහොත් ඊට මුහුණ දීම සඳහා ගත යුතු පියවර සහ පෙර සූදානම් විය යුතු ආකාරය සම්බන්ධව මෙහිදී දීර්ඝ ලෙස සාකච්ඡා කෙරුණා.
එසේම එල්-නිනෝ තත්ත්වය හමුවේ කෘෂිකර්ම ක්ෂේත්රයට ඇති විය හැකි බලපෑම පිළිබඳව මෙහිදී විශේෂ අවධානය යොමුවුණා.
ඉදිරියේදී එළඹෙන යල කන්නයට අවශ්ය ජලය ජලාශවල ගබඩා කර ගැනීම සහ පානීය ජලය සුරක්ෂිත කර ගැනීම සම්බන්ධවද සාකච්ඡා කෙරුණු අතර, ඒ පිළිබඳව අදාළ ආයතනවල අදහස් සහ යෝජනා ලබා දෙන ලෙස අමාත්ය වසන්ත සමරසිංහ නිලධාරීන්ට උපදෙස් දුන්නා.
මේ පිළිබඳ වැඩිදුර සාකච්ඡා කිරීමට ආහාර ප්රතිපත්ති සහ සුරක්ෂිතතා කමිටුවේ විශේෂ රැස්වීමක් ඉදිරියේදී පැවැත්වීමටද මෙහිදී තීරණය කෙරුණු අතර, එල්-නිනෝ තත්ත්වයට මුහුණ දිය යුතු ආකාරය සම්බන්ධව සැලසුම් සකස් කර එදිනට ඉදිරිපත් කරන ලෙස කෘෂිකර්ම අමාත්යාංශය, කෘෂිකර්ම දෙපාර්තමේන්තුව, මහවැලි අධිකාරිය, වාරිමාර්ග දෙපාර්තමේන්තුව ඇතුළු රේඛීය ආයතනවලට උපදෙස් ලබා දෙනු ලැබුවා.
දිට්වා සුළි කුණාටුව සහ මැදපෙරදිග යුදමය තත්ත්වය හමුවේ ඇති වූ අභියෝගවලට මුහුණ දුන් ආකාරයටම බාහිර අභියෝගයක් වන මෙම ගෝලීය තත්ත්වයද හොඳින් කළමනාකරණය කිරීමට සැලසුම් පවතින බවත්, ඒ පිළිබඳ රජයේ විශේෂ අවධානය යොමුව තිබෙන බවත් අමාත්යවරු මෙහිදී පෙන්වා දුන්නා.
ස්වභාවික ආපදා කිසිසේත් පුරෝකථනය කළ නොහැකි බවත්, ඇති විය හැකි ඕනෑම තත්ත්වයකට මුහුණ දීම සඳහා කල්තියා සැලසුම් සකස් කළ යුතු බවත් අමාත්ය වසන්ත සමරසිංහ වැඩිදුරටත් පෙන්වා දෙනු ලැබුවා.
