එක්සත් ජනපදයේ අනතුරු ඇඟවීම් නොතකා රුසියාව ඉන්දියාවට තෙල් සැපයීම දිගටම කරගෙන යාමට අපේක්ෂා කරන බව නවදිල්ලියේ රුසියානු තානාපති කාර්යාල නිලධාරීන් බදාදා ප්රකාශ කළා.
රුසියාව ඉන්දියාව සහ චීනය සමඟ ත්රෛපාර්ශ්වික සාකච්ඡා ඉක්මනින් සිදුවනු ඇතැයි ද ඔවුන් බලාපොරොත්තු පළ කරනවා.
රුසියානු තෙල් මිලදී ගැනීම සඳහා දඬුවමක් ලෙස අගෝස්තු 27 සිට එක්සත් ජනපදයට අපනයනය කරන ඉන්දියානු භාණ්ඩ සඳහා 25% ක අතිරේක තීරුබදුවක් එක්සත් ජනපද ජනාධිපති ඩොනල්ඩ් ට්රම්ප් නිවේදනය කළා.
ඉන්දියාවේ රුසියානු තානාපති කාර්යාලයේ භාරකාර රෝමන් බබුෂ්කින් මාධ්ය හමුවකදී අනාවැකි පල කළේ ට්රම්ප්ගේ නවතම තීරුබදු හමුවේ ඔවුන්ගේ “ජාතික අවශ්යතා” ජය ගැනීමට ඉන්දියාව සහ රුසියාව නව මාර්ග සොයා ගනු ඇති බවයි.
රුසියාවේ නියෝජ්ය වෙළඳ කොමසාරිස් එව්ගනි ග්රිවා ඊයේ පැවසුවේ රුසියාවෙන් තෙල් මිලදී ගැනීම ඉන්දියාවට “ඉතා ලාභදායී” බවත්, ඔවුන් තම සැපයුම්කරු වෙනස් කිරීමට කැමති නොවන බවත්ය.
සාමාන්යයෙන් රුසියාව ඉන්දියානු ගැනුම්කරුවන්ට 5%-7% ක වට්ටමක් ලබා දෙන බව ඔහු පැවසුවා.
වොෂින්ටනය සහ නවදිල්ලිය අතර ආතතීන් වැඩි වන විට, මේ සතියේ නවදිල්ලිය සහ බීජිං අතර සබඳතා නව තලයකට එසවුණේ චීන විදේශ අමාත්යවරයාගේ ඉන්දීය සංචාරයත් සමගයි.
ඉන්දීය අගමැති නරේන්ද්ර මෝදි මෙම මාසයේ අගභාගයේදී වසර හතකට වැඩි කාලයකට පසු පළමු වරට චීනයේ සංචාරය කිරීමට සැලසුම් කර තිබෙනවා.
ඒ සමඟම, “වඩා විශාල යුරේසියානු හවුල්කාරිත්වයක්” ඇති කර ගැනීමට උපකාර කිරීම සඳහා ඉන්දියාව සහ චීනය සමඟ ත්රෛපාර්ශ්වික රැස්වීමක් සඳහා දිගුකාලීන සැලසුම් නැවත පණ ගැන්වීම රුසියාවේ උත්සාහයයි.
