ආරක්ෂක අංශයේ සැමරුම් වෙනුවෙන් ශ්‍රී දළඳා මාලිගාවේ විශේෂ ආගමික වැඩසටහන් රැසක්

ශ්‍රී ලංකා පොලිස් විශේෂ කාර්ය බලකායේ 40 වැනි රණවිරු සැමරුම් දිනය ඊයේ (02) සහ අද (03) මහනුවර ඓතිහාසික ශ්‍රී දළදා මාලිගාවේ දී සිදු කරනු ලැබුවා.

සෑම වසරකම සිදු කරන මෙම ආගමික වතාවත් හා දානමය පුණ්‍ය කර්මය වෙනත් වසරවල දී මෙන්ම මෙවරත් සිදු කිරීමට සියලු කටයුතු සලසා තිබුණා.

30 වසරක යුද්ධයෙන් මියගිය රණවිරුවන් හා ඔවුන්ගේ පවුල්වලට මෙන්ම සමස්ත රටවැසියන්ටත් ආශිර්වාද පතා ශ්‍රී දළදා මාලිගාවේ දී මෙම දානමය පුණ්‍ය කර්මය පැවැත්වූ බවයි අප ප්‍රාදේශීය වාර්තාකරු සඳහන් කළේ.

ඊයේ ශ්‍රී දළදා සමිඳුන් වෙත ගිලන්පස පූජාවක් පැවැත්වීමෙන් අනතුරුව අද (03) දහවල් 25 නමක් කෙරෙහි දානමය පිංකමක් ද සිදු කරනු ලැබුවා.

මෙම ආගමික වතාවත් සහ දානමය පුණ්‍ය කර්මය සඳහා මල්වතු පාර්ශ්වය අනූනායක අතිපූජ්‍ය දිඹූල්කුඹුරේ ශ්‍රී විමලධම්මාභිධාන නායක හිමියන් ඇතුළු මහා සංඝරත්නය වැඩම කර සිටියා.

මේ අතර සිවිල් ආරක්ෂක බලකායේ 18 වන සැමරුම් උත්සවයට සමගාමීව ද ඓතිහාසික මහනුවර ශ්‍රී දළදා සමිඳුන්ගේ ආශිර්වාද ලබා ගැනීමත් ආරක්ෂක බලකාය සතු ධජ ආශිර්වාද ගැන්වීමත් සිදු කෙරුණා.

මෙහිදී සිවිල් ආරක්ෂක බලකායේ බලකා 24ක ධජ ආශිර්වාද ගැන්වීම සිදු වූ බවයි පැවසෙන්නේ.

සිවිල් ආරක්ෂක බලකායේ 18 වන සැමරුමට සමගාමීව දිවයිනේ විවිධ ආගමික සිද්ධස්ථානවල දී ආගමික කටයුතු සිදු වුණා.

මේ අවස්ථාවන්ට සිවිල් ආරක්ෂක බලකායේ සාමාජිකයන් පිරිසක් ඇතුළු රණවිරු පවුල් රැසක් එක්ව සිටියා.