මුස්ලිම් ආගමික පූජකවරයෙකු වීමට අධ්‍යාපනය ලැබීමට පානදුර – මෝදර පිහිටි දහම් අධ්‍යාපන ආයතනයට ගිය 15 හැවිරිදි සිසුවෙකු අතුරුදන් ව තිබෙනවා.
දසත ප්‍රාදේශීය වාර්තාකරු පැවසුවේ මෙම සිසුවා කළුතර – නාගොඩ ප්‍රදේශයේ පදිංචිකරුවෙකු බව කළුතර දකුණ පොලිසිය පැවසූ බවයි.
ජාසම් මොහොමඩ් නමැති පාසල් සිසුවෙකු මෙලෙස අතුරුදන් ව තිබෙනවා.
අතුරුදන් සිසුවා පානදුර – මෝදර මද්‍රසා දහම් අධ්‍යාපන ආයතනයේ ඉගෙනුම ලබන බවත් ඔහු දෙසැම්බර් මස 10 වැනි දින සිය නිවාඩුව අවාසනයේ යළි විද්‍යාලයට යාම සඳහා ජනවාරි මස 02 වැනි දින පස්වරු 2.45ට කළුතර හොලික්‍රොස් විද්‍යාලය ඉදිරිපිට බස් නැවතුම්පොළෙන් කොළඹ බස් රථයකට නැග ඇති බවත් පොලිස් පැමිණිල්ලේ සඳහන්.
මෙම දරුවා පාසල් අධ්‍යාපනයෙන් ඉවත් වූයේ මද්‍රසා පාසලේ ඉගෙනුම ලැබීමට තිබූ දැඩි කැමැත්ත මත බවයි දෙමාපියන් පවසා ඇත්තේ.
පවුලේ වැඩිමහල් පිරිමි දරුවා වන අතුරුදන් වූ දරුවා පාසලට නො පැමිණෙන්නේ කුමන හේතුවක් මත දැයි ඔහුගේ මද්‍රසා දහම් පාසලේ ගුරුවරුන් දූරකථන ඇමතුම් මාර්ගයෙන් මවගෙන් විමසා තිබෙනවා.
ඉන් පසුව තමන් දරුවා පාසලට නොගොස් ඇති බවට දැනගත් බවයි අතුරුදන් වූ දරුවාගේ මව කළුතර දකුණ පොලිසිය පවසා ඇත්තේ.
සතියකට ආසන්න කාලයක සිට මෙම දරුවා ආ ගිය අතක් නොමැති අතර දරුවා සොයා පොලිස් මෙහෙයුම් ක්‍රියාත්මකයි.
