ආකර්ශනීයම ඔලිම්පික් නිල ඇඳුම් අතර ශ්‍රී ලංකාවට තුන්වන තැන – පළමු තැන මොන්ගෝලියාවට

2024 පැරිස් ඔලිම්පික් සමාරම්භක උළෙලට එක් වූ රටවල ක්‍රීඩක ක්‍රීඩිකාවන් ඇඳ සිටි නිල ඇඳුම්වලින් වඩාත්ම ආකර්ශනීය නිල ඇඳුම් අතර තුන්වන ස්ථානය ශ්‍රී ලංකා නිල ඇඳුමට හිමිව තිබෙනවා.

ජනප්‍රිය ක්‍රීඩා සඟරාවක් වන සපෝර්ට් ඉලස්ට්‍රේටඩ් විසින් මෙම තෝරාගැනීම සිදුකර ඇති බවයි වාර්තා වුණේ.

සපෝර්ට් ඉලස්ට්‍රේටඩ් සඟරාවට විසින් මෙවර ඔලිම්පික් සමාරම්භක උළෙලට එක්වූ රටවල ක්‍රීඩක ක්‍රීඩිකාවන් පැළඳ සිටි නිල ඇඳුම් අතරින් නිල ඇඳුම් 11ක් මෙලෙස හොඳම නිල ඇඳුම් අතරට තෝරාගෙන තිබීම විශේෂත්වයක්.

ඒ, අනුව එහි පළමුවැන්න මොංගෝලියානු ඔලිම්පික් කණ්ඩායම පැළඳ සිටි නිල ඇඳුමට හිමිව තිබෙනවා.

මෙම ඇඳුම තුළ මොන්ගෝලියානු සංස්කෘතියේ ගැඹුරින් මුල් බැසගත් සංකේත ඇතුළත් වන බවයි සපෝර්ට් ඉලස්ට්‍රේටඩ් සඟරාව දන්වා සිටියේ.

මෙවර ඔලිම්පික් සමාරම්භක උළෙලේ වඩාත්ම ආකර්ශනිය නිල ඇඳුම් අතර, දෙවන ස්ථානය හිමිව ඇත්තේ මෙක්සිකානු ඔලිම්පික් කණ්ඩායමේ නිල ඇඳුමටයි.

මෙම නිල ඇඳුමේ ජැකට්ටුවේ ඉහළ අතේ ඇති මෝස්තරය එරට වඩාත්ම කැපී පෙනෙන නගර කිහිපය ආභාෂය ලබා ඇති අතර, කළු ටී-ෂර්ටය මඟින් මෙක්සිකෝවේ නිදහස් සංග්‍රාමයේ ශත සංවත්සරය අනුස්මරණය කරනවා.

මේ අතර සපෝර්ට් ඉලස්ට්‍රේටඩ් සඟරාව තෝරාගෙන ඇති 2024 ඔලිම්පික් නිල ඇඳුම් අතර, ශ්‍රී ලංකා නිල ඇඳුමට තුන්වන ස්ථානය හිමිව තිබීම විශේෂත්යක්.

19 වැනි සියවසේ ශ්‍රී ලංකා රාජකීය ආභාශය මෙම නිල ඇඳුමට එක්කර ඇති බවයි එම සඟරාව පවසන්නේ.

2024 පැරිස් ඔලිම්පික් සමාරම්භක උළෙලේ වඩාත්ම ආකර්ශනීය නිල ඇඳුම් අතර, සිව්වන සහ පස්වන ස්ථාන පිළිවෙලින් කැනඩා ඔලිම්පික් කාණ්ඩායමේ නිල ඇඳුමට සහ අයර්ලන්ත කණ්ඩායමේ ඔලිම්පික් නිල ඇඳුමට හිමිව තිබෙනවා.