කොහුවල පොලිස් වසමේ බෝධියත්ත ප්රදේශයේ නිවසක් ඉදිරිපිට දී පසුගිය දෙසැම්බර් 30 වනදා යතුරුපැදියකින් පැමිණි නාඳුනන පුද්ගලයින් දෙදෙනෙකු විසින් සිදුකළ වෙඩි තැබීමකින් අවුරුදු 16ක දැරියකට තුවාල සිදුකර මනුෂ්ය ඝාතනයට තැත් කිරීමේ අපරාධයට අදාළ සැකකරුවන් සිව්දෙනෙකු අත්අඩංගුවට ගෙන තිබෙනවා.
ඒ අනුව යතුරුපැදියේ පැදිකරු, ගිනි අවිය භාරව කටයුතු කළ සැකකරු, ගිනි අවි ප්රවාහනය කළ සැකකරු සහ අපරාධකරුවන්ට නවාතැන් පහසුකම් ලබාදුන් සැකකරු මෙලෙස අත්අඩංගුවට ගෙන ඇති බවයි වාර්තා වන්නේ.
ගල්කිස්ස කොට්ඨාස අපරාධ විමර්ශන කාර්යංශයේ නිලධාරීන් කණ්ඩායමක් විසින් ඊයේ (03) දින දෙහිවල පොලිස් වසමේ කළුබෝවිල ප්රදේශයේ දී මොවුන්ව අත්අඩංගුවට ගෙන කොහුවල පොලිස් ස්ථානය වෙත ඉදිරිපත් කර ඇති බව සඳහන්.
අත්අඩංගුවට ගැනුණු සැකකරුවන් අවුරුදු 25, 28, 33 හා 45 වයස්වල පසුවන දෙහිවල ප්රදේශයේ පදිංචිකරුවන් බවයි පොලිසිය පැවසුවේ.
මෙම අපරාධය සංවිධානාත්මක අපරාධකරුවන් හා මහා පරිමාණ මත්ද්රව්ය ජාවාරකරුවන් දෙපිරිසක් අතර ඇති වූ ගැටුමක ප්රතිපලයක් බවට පොලිසිය විසින් දැනට සිදුකරන ලද විමර්ශනයේදී අනාවරණය වී තිබෙනවා.
මේ අතර වැටලීමේදී සැකකරුවන් සන්තකයේ තිබී රිවෝල්වර් වර්ගයේ ගිනි අවි 03ක්, 09 mm වර්ගයේ ජීව පතරොම් 10ක්, හෙරොයින් ග්රෑම් 50ක්, අයිස් මත්ද්රව්ය ග්රෑම් 55ක් හා අපරාධයට යොදාගත් යතුරුපැදි 02ක් ද පොලිස් භාරයට ගෙන තිබෙනවා.
සිද්ධිය පිළිබඳව කොහුවල පොලිසිය වැඩිදුර විමර්ශන සිදුකරනු ලබනවා.
මේ අතර මෙම වෙඩි තැබීමේ සිද්ධියේ වෙඩික්කරු අත්අඩංගුවට ගැනීමට පොලිසිය මහජන සහාය පතමින් වෙඩික්කරුගේ රුව බව කියන ඡායාරුපයක් ද ප්රසිද්ධියට පත්කර තිබෙනවා.
