අවසන් සටන ජයගන්න කැන්ගරුවන්ට ලකුණු 241ක ඉලක්කයක්

2023 එක්දින ලෝක කුසලාන තරගයේ අවසන් මහා තරගය මේ වන විට අහමදාබාද් හි නරේන්ද්‍ර මෝදි ක්‍රීඩාංගණයේ දී ක්‍රියාත්මකයි.

මෙම තරගයේ කාසිය වාසිය දිනූ ඕස්ට්‍රේලියානු ආරාධනයෙන් ඉන්දීය කණ්ඩායම පළමුව ලකුණු රැස් කිරීම ආරම්භ කළා.

ඒ, අනුව ප්‍රබල ඉන්දීය කණ්ඩායම පන්දුවාර 50 තුළ සියල්ලන් දැවී ලකුණු 240 කට සීමා කරන්නට ඕස්ට්‍රේලියානු පන්දු යවන්නන්ට හැකියාව ලැබුණා.

එහිදී ඉන්දීය ඉනිම වෙනුවෙන් වැඩිම ලකුණු ලාභියා වූ ලෝකේශ් රාහුල් පන්දු 107ක් තුළ ලකුණු 66ක් රැස්කළ අතර, ඔහුගේ මෙම ඉනිමට ඇතුළත් වූයේ එක් හතරේ පහරක් පමණයි.

මීට අමතරව ඉන්දීය ඉනිම වෙනුවෙන් විරාට් කෝලි ලකුණු 54ක් රැස්කළ අතර, නායක රෝහිත් ශර්මා රැස්කළ ලකුණු සංඛ්‍යාව 47ක්.

මේ අතර වෙනදා මෙන් ඉන්දීය ඉනිම හයේ සහ හතරේ පහරවල් වලින් වර්ණවත් වන ආකාරය අද දිනයේ දැකගැනීමට හැකි වූයේ නැහැ.

මේ හේතුවෙන් අහමදාබාද් හී නරේන්ද්‍ර මෝදී ක්‍රීඩාංගණයට රැස්ව සිටි එක්ලක්ෂ තිස්දහසකට අධික ප්‍රේක්ෂකයින් වැඩි කාලයක් නිහඬවම ඉන්දීය ඉනිම නරඹන්න ආකාරය දැකගත හැකි වුණා.

ඉන්දීය ඉනිමේ දී අද දිනයේ වාර්තා වූයේ හතරේ පහර 13ක් සහ හයේ පහර 03ක් පමණයි.

පන්දු යැවීමේ දී මිචෙල් ස්ටාක් කඩුලු 03ක් දවාගැනීමට සමත් වූ අතර, නායක පැට් කමින්ස් ද ඉන්දීය ඉනිමේ කඩුලු 02ක් බිඳ දැමුවා.

ඒ, අනුව 2023 එක්දින ලෝක කුසලානයේ ජයගැනීම වෙනුවෙන් ඕස්ට්‍රේලියානු කණ්ඩායමට පන්දු 300ක් තුළ ලකුණු 241ක ඉලක්කයක් හිමිව තිබෙනවා.