දිවයිනට බලපා ඇති අයහපත් කාලගුණික තත්ත්වය හේතුවෙන් මේ වනවිට (28) දිස්ත්‍රික්ක 20කට දැඩි බලපෑම් එල්ල වී තිබෙනවා.
ආපදා කළමනාකරණ මධ්‍යස්ථානය පැවසුවේ ප්‍රාදේශීය ලේකම් කොට්ඨාස 166ක, පවුල් 80,642 දෙදෙනකු පීඩාවට ලක් ව ඇති බවයි.
ඊට අමතරව දිවයිනේ සමස්ත පුද්ගලයින් 276,550 දෙනෙකු අවතැන් වී ඇති බව ද වාර්තා වනවා.
පවුල් 5305කට අයත් පුද්ගලයින් 16,553 දෙනෙකු අවතැන් කඳවුරුවල ජීවත් වන බව ද ආපදා කළමනාකරණ මධ්‍යස්ථානය නිවේදනය කළා.
එමෙන්ම මෙම අයහපත් කාලගුණයෙන් දැඩි බලපෑම් එල්ල වී ඇත්තේ උතුරු – නැගෙනහිර පළාත් වෙතයි.
එහිදී වව්නියාවේ මහ වැව් 30ක් පිටාර ගලා යමින් තිබෙන බවත්,තවත් වැව් 250ක් වැව් බැමි සමග කඩා වැටීමේ දැඩි අවදානම් තත්ත්වයකට පත් ව ඇති බවත් ප්‍රාදේශීය වාර්තාකරු පැවසුවා.
වැව් නිමා පුරවරය වූ වව්නියාව දිස්ත්‍රික්කයේ වැව් 800කට අධික ප්‍රමාණයක් පිහිටා ඇති අතර මෙලෙස වැව් බැමි එකවර විශාල ප්‍රමාණයක් කඩා වැටුණු පළමු අවස්ථාව ද මෙය බැවින් පහත්බිම්වල ජීවත් වන ජනතාවට දැඩි පරික්ෂාවකින් ජීවත් වන ලෙසටත් ආපදා කළමනාකරණ මධ්‍යස්ථානය ඉල්ලා සිටිනවා.
මධ්‍යම කඳුකරයේ බටහිර බෑවුම් ප්‍රදේශයට පවතින වැසි තත්ත්වයන් මත කාසල්රි ජලාශයේ ජල මට්ටම පිටාර මට්ටමට ළඟා වී තිබෙනවා.
මේ පිළිබඳව කරන ලද විමසීමක දී අදහස් දැක්වූ එම ජලාශ භාර නිලධාරියකු පැවසුවේ මෙම ප්‍රදේශයන්ට පවතින වැසි තත්ත්වයේ වැඩිවීමත් සමග ජලාශයේ ජල මට්ටම ඉහළ ගොස් ඇති බවයි.
එම තත්ත්වය මත මේ වන විට කාසල්රි ජලාශයේ ජල මට්ටම පිටාර මට්ටමට අඩියයි අඟල් 05ක් පමණ පහළින් පවතින බවත්; මෙම ජලාශයේ ජලය ජල විදුලිය නිපදවීම සඳහා උපරිම ලෙස මුදා හැරීමටත් කටයුතු යොදා තිබෙනවා.
මේ වනවිට සුළි කුණාටුව මුලතිව් ප්‍රදේශය දෙසට ගමන් කිරීම ආරම්භ කර තිබෙනවා.
වට්ටුවාක්කල් පාලම් මාර්ගය ද ජලයෙන් යට වී ඇති බවත් වාර්තා වනවා.
