අයහපත් කාලගුණයෙන් කටුනායක ගුවන් ගමන්වලට දැඩි බාධා

කටුනායක ගුවන් තොටුපළෙන් පිටත්ව යන සහ ගුවන් තොටුපළ වෙත පැමිණෙන ගුවන් යානා කීපයක ප්‍රමාදවීම් සහ අවලංගු කිරීම් වාර්තා වී තිබෙනවා.

කටුනායක ගුවන් තොටුපළ අවට පැවති අධික වැසි සහිත කාළගුණික තත්වය එයට හේතු වී ඇති බවයි ගුවන්තොටුපොළ අප වාර්තාකරු සඳහන් කළේ.

ඒ, අනුව ඊයේ (07) පස්වරු 06.25 ට ඩුබායි බලා පිටත්ව යාමට නියමිත ශ්‍රී ලන්කන් ගුවන් සේවයේ යූ.එල්.- 225 දරන ගුවන් යානයේ පිටත්ව යාම අද (08) උදෑසන 09.15 දක්වා පැය 15 කට ආසන්න කාලයක් ප්‍රමාද වී තිබෙනවා.

එමෙන්ම ඩුබායි සිට කටුනායක ගුවන් තොටුපළ වෙත අද (08) දින අලුයම 04.45ට පැමිණීමට නියමිතව තිබූ ශ්‍රී ලන්කන් ගුවන් සේවයේ යූ.එල්.- 226 ගුවන් යානය විනාඩි 10ක කාලයක් ප්‍රමාද වී ඇති බවයි වාර්තා වන්නේ.

ජපානයේ නරීටා බලා කටුනායක ගුවන් තොටුපළෙන් ඊයේ (07) රාත්‍රී 07.15 ට පිටත්ව යාමට නියමිතව තිබූ ශ්‍රී ලන්කන් ගුවන් සේවයේ යූ.එල්.- 454 ගුවන් යානය පිටත්ව යෑම අද අලුයම 01.50 දක්වා කල් දැමීමට ද සිදුව තිබෙනවා.

එමෙන්ම කටුනායක ගුවන් තොටුපළෙන් ඉන්දියාවේ මුම්බායි බලා ඊයේ (07) දින රාත්‍රී 11.40 ට පිටත්ව යාමට නියමිතව තිබූ ශ්‍රී ලන්කන් ගුවන් සේවයේ යූ.එල්.- 141 ගුවන් ගමන ද අවලංගු කරනු ලැබුවා.

ඒ හේතුවෙන් අද (08) දින අලුයම 05.35 ට මුම්බායි සිට කටුනායක ගුවන් තොටුපළ වෙත පැමිණීමට නියමිතව තිබූ ශ්‍රී ලන්කන් ගුවන් සේවයේ යූ.එල්.- 142 ගුවන් ගමන ද අවලංගු කර තිබෙනවා.

මීට අමතරව චීනයේ ෂැංහයි නුවර සිට පැමිණි කටුනායක ගුවන් තොටුපළ වෙත ඊයේ (07) රාත්‍රී 07.00 ගොඩ බැස්සවීමට නියමිතව තිබු චයිනා ඊස්ටන් ගුවන් සේවයේ එම්.යූ.- 231 යානය , ඒ වනවිට කටුනායක ගුවන් තොටුපළ අවට තිබූ අධික වැසි සහිත කාළගුණික තත්වය නිසා මාලදිවයින මාලේ ගුවන් තොටුපළ වෙත යොමු කිරීමටයි කටයුතු කර ඇත්තේ.

එමෙන්ම කුවේටයේ සිට කටුනායක ගුවන් තොටුපළ වෙත ඊයේ (07) දින සවස 06.10ට පැමිණීමට නියමිතව තිබූ ශ්‍රී ලන්කන් ගුවන් සේවයේ යූ.එල්.- 230 දරන ගුවන් යානය ප්‍රමාද වී, අද (08) දින අලුයම 07.33ට මත්තල ගුවන් තොටුපළ වෙත ගොඩබස්වා තිබෙනවා.

මෙම ගුවන් යානය තුළ මගීන් 97 දෙනෙකු පැමිණ සිටි අතර, ඔවුන් බස් රථ මගින් , අද (08) අලුයම 03.30 වනවිට කටුනායක ගුවන් තොටුපළ වෙත කැදවා ගෙන පැමිණ තිබුණා.