ඉන්දීය සම්භවයක් සහිත අභ්‍යවකාශ ගගනගාමී සුනීතා විලියම්ස් හට නරේන්ද්‍ර මෝදි අග්‍රමාත්‍යවරයා විසින් සුබ පැතුම් ඇතුළත් ලිපියක් යොමු කර තිබෙනවා.
NDTV මාධ්‍ය වාර්තා කළේ; මෝදි සිය ලිපිය සුනීතා විලියම්ස් හට යොමු කරමින් සඳහන් කර ඇත්තේ; ”ඔබ අපේ හදවත්වලට සමීපයි” යනුවෙන් බවයි.
මාස 09කට අධික කාලයක් ජාත්‍යන්තර අභ්‍යවකාශ මධ්‍යස්ථානයේ රැඳී සිටි සුනීතා ඇතුළු සිය සගයා ඊයේ අලුයම 03.30 පමණ වන විට පෘථිවියට පැමිණියා.
මෝදි යොමු කළ ලිපිය අමාත්‍ය ජිතේන්ද්‍ර සිං විසින් X හි තබා තිබෙනවා.
ඒ මෙසේයි;
“ඔබ සහ ඔබගේ කාර්යය ගැන අපි කොතරම් ආඩම්බර වෙනවාද කියා අපි සාකච්ඡා කළා. මෙම ක්‍රියාවෙන් පසුව, ඔබ වෙනුවෙන් සටහනක් නොතබා සිටින්නට බැහැ. බිලියන 1.4 ක ඉන්දියානුවන් සැමවිටම ඔබගේ ජයග්‍රහණ ගැන මහත් ආඩම්බරයකින් සිටිනවා. මෑත කාලීන වර්ධනයන් ඔබගේ විශිෂ්ට වූ ධෛර්යය සහ නොපසුබට උත්සාහය පෙන්නුම් කර තිබෙනවා..” යනුවෙන් එහි සඳහන්.
විලියම්ස් මහත්මිය සහ ඇගේ සගයා වන බුච් විල්මෝර් පැය 17 අභ්‍යවකාශ ගමනකින් අනතුරුව යළිත් මෙලෙස නිරුපද්‍රිතව පෘථිවියට පැමිණියා.
මෙම මාසයේ දිල්ලි නුවර දී නාසා හි හිටපු ගගනගාමි මයික් මැසිමිනෝ සමඟ පැවති රැස්වීමක දී සුනීතා විලියම්ස්ගේ නම ඔවුන්ගේ සංවාදයේ දී මතු වූ බව අගමැති මෝදි සිහිපත් කර තිබෙනවා.
