මෙම වසරේ දී අධිවේගී මාර්ග ගණනාවක වැඩ ආරම්භ කරන බව ප්රවාහන හා මහා මාර්ග අමාත්ය සභා නායක බිමල් රත්නායක පවසනවා.
අද (08) දිනයේ පාර්ලිමේන්තුවේ දී අදහස් දක්වමින් බිමල් රත්නායක අමාත්යවරයා මේ බව සඳහන් කළා.
ඒ අනුව එළඹෙන නොවැම්බර් මාසයේ කුරුණෑගල සිට දඹුල්ල අධිවේගී මාර්ගයේ කුරුණෑගල-ගලේවෙල කොටසේ වැඩ ආරම්භ කරන බවයි ඔහු පැවසුවේ.
එමෙන්ම කහතුඩුවේ සිටි ඉංගිරිය දක්වා අධිවේගී මාර්ගය මෙම නොවැම්බර් හෝ දෙසැම්බර් මාසවල ආරම්භ කරන බවත් අමාත්යවරයා සඳහන් කළා.
මේ අතර කටුනායක සිට හලාවත දක්වා අධිවේගී මාර්ගයක් ඉදිකිරීම සඳහා සැලසුම්කරණය ආරම්භ කරන ලෙසට ජනාධිපතිවරයා උපදෙස් දී ඇති බවයි බිමල් රත්නායක අමාත්යවරයා මෙහිදී පැවසුවේ.
එහිදී කටුනායක සිට දැදුරු ඔය පාලම ආසන්නයට අධිවේගී මාර්ගය දිගු කිරීමට බලාපොරොත්තුවන බවයි ඔහු සඳහන් කර සිටියේ.
එමෙන්ම අනුරාධපුරය කේන්ද්ර කර ගනිමින් අධිවේගී මාර්ග පද්ධතියක් ඇරඹීමට සැලසුම් කර ඇති බවත්, කඩවත – මීරිගම අධිවේගී මාර්ග කොටස 2028 මැයි මාසයේ අවසන් කිරීමට හැකි වනු ඇති බවයි පැවසුවේ.
මේ අතර පොතුහැර – රඹුක්කන කොටස 2027 වසරේ අප්රේල් අවසන් කිරීමට කටයුතු කරන බවත් අමාත්යවරයා වැඩිදුරටත් අදහස් දක්වමින් සඳහන් කළා.
