සිය රෝගී තත්ත්වය පිළිබඳ ව අසත්‍ය වෛද්‍ය වාර්තා අධිකරණයට ඉදිරිපත් කිරීමේ චෝදනා මත විශේෂඥ නිර්වින්දන වෛද්‍ය බුද්ධික නුවන් කරුණාරත්න නමැත්තෙකු පෙබරවාරි මස 13 වැනි දින තෙක් රක්ෂිත බන්ධනාගාරගගත කිරීමට අද (23) අධිකරණය නියෝග කළා.
අද පෙරවරුවේ විත්තිකාර වෛද්‍යවරයා අධිකරණයට ඉදිරිපත් කළ අවස්ථාවේ දී කොළඹ මහාධිකරණ විනිසුරු මංජුල කරුණාරත්න මහතා මෙම නියෝගය කළ බවයි දසත අධිකරණ වාර්තාකරු පැවසුවේ.
පසුගිය 17 වැනිදා අධිකරණයේ පෙනී නොසිටිමින් තමන් දැඩි අසනීප තත්ත්වයකින් පෙළෙන බවට එදින ඉදිරිපත් කර තිබූ වෛද්‍ය වාර්තාව ගැන රජයේ අධිනීතිඥවරයාට පැන නැගුණු සැකයක් මත ඒ පිළිබඳ ව අධිකරණයට දැනුම්දී තිබුණා.
එහිදී අධිකරණ විනිසුරුවරයාට රජයේ අධිනීතිඥවරයා පෙන්වාදී තිබුණේ විත්තිකරුට අධිකරණයේ පෙනී සිටීමට නොහැකි තරමේ බරපතළ අසනීප තත්ත්වයක් තිබුණේ දැයි යන්නයි.
මේ පිළිබඳව කොළඹ ප්‍රධාන අධිකරණ වෛද්‍යවරයා ප්‍රමුඛ පංච පුද්ගල වෛද්‍ය මණ්ඩලයක් විසින් විත්තිකරු ඉදිරිපත් කරන ලද වෛද්‍ය වාර්තාව සහ විත්තිකරුගේ රෝගී තත්ත්වය සලකා බලා එය බරපතළ තත්ත්වයේ හෝ කිසිදු ආකාරයේ රෝගී තත්ත්වයක් නොමැති බවට වාර්තා කර තිබෙනවා.
මෙම ක්‍රියාව හේතුවෙන් සැකකාර වෛද්‍යවරයා අධිකරණය නොමග යැවීමට උත්සාහ ගත් බවට තීන්දු කළ විනිසුරු මංජුල මහතා ඔහුව රක්ෂිත බන්ධනාගාරගත කරන ලෙසට නියෝග කළා.
අදාළ සැකකරු පොලිස් අත් අඩංගුවට ගෙන ඇත්තේ තීරුබදු රහිත බලපත්‍ර උපයෝගී කරගනිමින් විදෙස් රටවලින් වාහන ගෙන්වාදෙන බවට පවසමින් වෛද්‍යවරුන් රවටා මුදල් වංචා කර සාපරාධී පරිහරණය හේතුවෙන්.
