අගලවත්ත පිඹුර රෝහල අසලදී සිදුවූ රිය අනතුරකින් පුද්ගලයෙකු මියගොස් තවත් තුන්දෙනෙකු තුවාල ලබා රෝහල් ගතකර තිබෙනවා.
එකම පවුලේ සහෝදරයන් දෙදෙනෙකු ගමන් කළ යතුරුපැදියක් ලොරියක ගැටීමෙන් ඊයේ රාත්‍රී මෙම අනතුර සිදුවී ඇති බවයි අප වාර්තාකරු සඳහන් කළේ.
මියගොස් ඇත්තේ මහගම මාහින්වත්ත ප්‍රදේශයේ පදිංචිව සිටි 62 හැවිරිදි අයෙක්.
යතුරුපැදියේ පසුපස ගමන් ගත් මියගිය අයගේ සහෝදරයා, ලොරි රියදුරු සහ සහායකයා තුවාල ලබා නාගොඩ සහ පිඹුර රෝහල්වලට ඇතුළත් කර තිබෙනවා.
පොලේගොඩ සිට අගලවත්ත දෙසට ධාවනය වූ ලොරි රථය ප්‍රතිවිරුද්ධ දිසාවෙන් පැමිණි යතුරුපැදියේ මුහුණට මුහුණ ගැටී මාර්ගයෙන් ඉවතට පැන විදුලි රැහැන් කණුවක ද ගැටී පෙරළී යාමෙන් අනතුර සිදුව ඇති බව සඳහන්.
කැබ් රථ රියදුරාගේ නොසැලකිලිමත් රිය ධාවනය හේතුවෙන් අනතුර සිදු වී ඇතැයි පොලිසිය ප්‍රකාශ කර තිබෙනවා.
අනතුර සම්බන්ධයෙන් අගලවත්ත පොලිසිය පරීක්ෂණ සිදුකරනවා.
