ෆ්‍රැන්සිස් පාප් වහන්සේ සිය ධුර කාලය තුළ ආසියා පැසිෆික් කලාපයේ දීර්ඝතම සහ දුරස්ථ සංචාරය ආරම්භ කරමින් ඉන්දුනීසියාවේ ජකර්තා අගනුවරට පැමිණ තිබෙනවා.
දින 12 ක සංචාරයේ දී ඔහු පාරිසරික ගැටළු සහ අන්තර් ආගමික සංවාදයේ වැදගත්කම ඉස්මතු කිරීමට අපේක්ෂා කරන බවයි විදෙස් මාධ්‍ය වාර්තා කරන්නේ.
පැපුවා නිව්ගිනියාව, සිංගප්පූරුව සහ ටිමෝර්-ලෙස්ටේ වෙත පාප් වහන්සේ සංචාරය කිරීමට නියමිතයි.
දෙසැම්බර් මාසයේ දී 88 වන වියට පා තබන සහ සෞඛ්‍ය ගැටළු රාශියක් සමඟ පොරබදමින් සිටින මිනිසෙකු මෙවන් සංචාරයක නිරත වීම ම දැවැන්ත අභියෝගාත්මක ගමනක් විය හැකි බවයි BBC පුවත් සේවය පාප් වහන්සේගේ නිල සංචාරය හුවා දක්වමින් සඳහන් කරන්නේ.
ආසියා පැසිෆික් කලාපය කතෝලික පල්ලිය බව්තීස්ම වූ ඇදහිලිවන්ත හා ආගමික වෘත්තීන් අනුව වර්ධනය වන ස්ථාන කිහිපයෙන් එකක්.
ෆ්‍රැන්සිස් පාප් වහන්සේ සිය නිල “X” ගිණුමේ සටහනක් දක්වමින් පවසන්නේ, “අද මම ආසියාවේ සහ ඔෂේනියා (Oceania)ආදි රටවල් කිහිපයකට ගමනක් ආරම්භ කරන බවයි”.
ගෝලීය වශයෙන් වැඩිම මුස්ලිම් ජනගහනයක් සිටින ඉන්දුනීසියාවට පැමිණි තුන්වන පාප්වරයා ද ඔහු වනු ඇති.
