මෙරට ප්‍රසිද්ධ විශ්වවිද්‍යාලයක ආචාර්‍යයවරියක් ඇතුළු තවත් තිදෙනෙකු නවසීලන්තයේ රැකියා අවස්ථා ලබාදෙන බව පවසමින්, පුද්ගලයන්ගෙන් මුදල් වංචා කර ඇති බවට චෝදනා කරමින් අසාධාරණයට ලක් වූ පිරිසක් අද (16) පෙරවරුවේ විදේශ සේවා නියුක්ති කාර්යාංශයට පැමිණිල්ලක් ඉදිරිපත් කර තිබෙනවා.
ආචාර්ය තියන්ගි ජයතිලක, ගයා සංජීව කරුණාතිලක සහ ශිරානි ප්‍රියදර්ශනී ජයසිංහ යන අය මෙලෙස නවසීලන්තයේ විදේශ රැකියා ලබාදෙන බව පවසා 80 දෙනෙකුගෙන් පමණ මුදල් ලබාගෙන විදේශගත නොකර ඔවුන් මග හරිමින් සිටින බව‍ටයි ජාවාරමට හසු වූ පිරිස් චෝදනා කරන්නේ.
මේ වන විට රුපියල් ලක්ෂ 890ක පමණ මුදලක් මොවුන් වංචා කර ඇති බව විදෙස්ගත වීමට නොහැකි වූ පිරිස් චෝදනා කරනවා.
ඔවුන් ඉල්ලා සිටින්නේ කඩිනමින් මෙම පිරිස් නීතියට හසුකරගෙන තම මුදල් නැවත ලබාදීමට කටයුතු කරන ලෙසයි.
තියන්ගි නමැති විශ්වවිද්‍යාල කථිකාචාර්යවරිය ආචාර්‍යයවරියක් ලෙස පෙනී සිටිමින් ඡායාරූප පෙන්වා ජනතාව මුලා කරමින් මෙලෙස විදේශ රැකියා ජාවාරමේ යෙදෙන බව වාර්තා වනවා.
කෙසේවෙතත් මෙම සිදුවීම සම්බන්ධයෙන් චෝදනා එල්ල වී ඇති අදාළ ආචාර්‍යයවරියගෙන් දසත ප්‍රවෘත්ති අංශය සිදු කළ විමසීමක දී ඇය සඳහන් කර සිටියේ; තමන් මෙහි අතරමැදියෙකු බවත්, තමන් ද වෙනත් පාර්ශ්වයකට රට රැකියා සඳහා පුද්ගලයින් යොමු කිරීම වෙනුවෙන් මුදල් ලබා දී ඇති බැවින් මේ පිළිබඳ ව අපරාධ පරීක්ෂණ දෙපාර්තමේන්තුවට පැමිණිල්ලක් ද ගොනු කර ඇති බවයි.
