ආයුධ සන්නද්ධ පිරිසක් ප්‍රංශ බන්ධනාගාර වෑන් රථයකට වෙඩි තබා නිලධාරීන් දෙදෙනෙකු ඝාතනය කර සිරකරුවෙක් මුදාගෙන තිබෙනවා.
උතුරු ප්‍රංශයේ නෝමැන්ඩි හි රූඕන් නගරයේ අධිවේගී මාර්ගයක පිවිසුම අසල දී මෙම ප්‍රහාරය එල්ල වූණා.
බන්ධනාගාර වෑන් රථය ගාස්තු ගෙවා ඉදිරියට පැමිණෙන අවස්ථාවේ මෝටර් රථයක් එහි ගැටෙන්නට සලස්වා ඉන් පිටතට පැමිණෙන තුවක්කුකරුවන් වෑන් රථය දෙසට වෙඩි තබන අයුරු ආරක්‍ෂිත කැමරාවක සටහන්ව තිබුණා.
මෙහිදී බන්ධනාගාර නිලධාරීන් භාරයේ සිටි සිරකරුවෙක් තුවක්කුකරුවන් විසින් මුදාගෙන තිබෙනවා.
වෙඩි ප්‍රහාරයෙන් බන්ධනාගාර නිලධාරීන් දෙදෙනෙක් මිය ගිය අතර, තවත් දෙදෙනෙක් තුවාල ලැබුවා.
පළා ගිය අපරාධකරුවන් සොයා ප්‍රංශ පොලිසිය හා ආරක්ෂක අංශය සිය ගණනක පිරිසක් විශේෂ සෝදිසි මෙහෙයුමක් ආරම්භ කර තිබෙනවා.
ප්‍රහාරය එල්ල වී ඇත්තේ සැකකරු අධිකරණයට ඉදිරිපත් කර යළි බන්ධනාගාරය වෙත රැගෙන එමින් සිටියදීයි.
පළා ගිය රැඳවියා 1994 වසරේ උපන් මොහොමඩ් අම්රා ලෙස හඳුනා ගෙන ඇති අතර, ඔහු මැයි 10 වැනිදා සිදු වූ සොරකමකට අදාළව වරදකරු වී ඇති අතර පුද්ගලයෙක් පැහැරගෙන ගොස් ඝාතනය කිරීම සම්බන්ධයෙන් ද ඔහුට එරෙහිව අධිචෝදනා ගොනු කර තිබෙනවා.
කෙසේ වෙතත් අම්රා දරුණු ගණයේ අපරාධකරුවකු ලෙස සැලකූ අයෙක් නොවන බව ප්‍රංශ බලධාරීන් පවසනවා.
ප්‍රංශ පාර්ලිමේන්තුවේ දී විනාඩියක නිශ්ශබ්දතාවක් ආරක්ෂා කරමින් මෙම සිද්ධියෙන් විපතට පත් නිලධාරීන් සිහිපත් කෙරුණා.
