චීනයේ ටිබෙට් හෙවත් ෂීසංග් ස්වායත්තයේ ෂිගට්සේ නගරයට ඊයේ (07) දිනයේ බලපෑ ප්‍රබල භූකම්පනයෙන් ආපදාවන්ට ලක් වූ ප්‍රදේශ වෙත චීන මධ්‍යම රජය විසින් සපයන ලද ප්‍රථම සහන සැපයුම් තොගය ළඟා වී තිබෙනවා.
චීනයේ හදිසි කළමනාකරණ අමාත්‍යාංශය, ආහාර හා තැන්පත් කිරීමේ ජාතික පරිපාලනය ඇතුළු ආයතන විසින් සපයනු ලැබූ එම සහන සැපයුම් ඊයේ (07) රාත්‍රීයේ එම ප්‍රදේශ වෙත ළඟා වී ඇති බවයි සඳහන් වන්නේ.
6,000 කට ආසන්න කූඩාරම්, ඇඳ ඇතිරිලි මෙන්ම ඇඳුම් ද ඊට ඇතුළත් අතර, තවත් 16,000ක පමණ සහන තොගයක් අද (08) එම ප්‍රදේශ වෙත ළඟා වීමට නියමිතයි.
ඊයේ (07) පෙරවරු 7.00 පමණ වන විට, ෂිගට්සේ නගරයේ සිදු වූ ප්‍රබල භූමිකම්පාවෙන් 126 දෙනෙකු මිය ගිය අතර තුවාල ලැබූ සංඛ්‍යාව 188ක්.
කෙසේ වෙතත් භූමිකම්පාවෙන් අවහි‍ර වූ මාර්ග සියල්ල මේවන විට යථා තත්ත්වයට පත් කර ඇති බවයි චීන මාධ්‍ය පවසන්නේ.
මේ අතර මෙම භූමිකම්පාවෙන් මිය ගිය අය හා ඔවුන්ගේ ඥාතීන් වෙත සිය ශෝකය පළ කරමින් එක්සත් ජාතීන්ගේ මහලේකම් ඇන්ටෝනියෝ ගුටරෙස් ඊයේ (07) නිවේදනයක් නිකුත් කර තිබෙනවා.
එමෙන්ම රුසියානු ජනපති ව්ලැදිමීර් පුටින් සහ සර්බියානු ජනාධිපතිවරයා මෙන් ම යුරෝපා කොමිසම ද මෙම අවාසනාවන්ත සිදුවීම සම්බන්ධයෙන් චීනය වෙත සිය කණගාටුව පළ කර ඇති බව සඳහන්.
