මැතිවරණ රාජකාරී වෙනුවෙන් පොලිස් නිලධාරීන් 63,145 දෙනෙක් ඍජුවම යෙදවීමට කටයුතු කරන බව පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව පවසනවා.
අද (08) පස්වරුවේ මාධ්‍ය හමුවකට එක්වෙමින් පොලිස් මාධ්‍ය ප්‍රකාශකවරයා මේ බව සඳහන් කළා.
ඊට අමතරව පොලිස් විශේෂ කාර්ය බලකා සාමාජිකයින් 3,200 දෙනෙකු මැතිවරණ රාජකාරී වෙනුවෙන් යෙදවීමට කටයුතු කරන බවයි ඔහු පැවසුවේ.
මේ අතර විශේෂිත ස්ථානවල ආරක්ෂාවට යොදවා ඇති පොලිස් නිලධාරීන් මැතිවරණ රාජකාරී වෙනුවෙන් එම ස්ථානවලින් ඉවත්කර ගැනීමට සිදුවන බව ද පොලිස් මාධ්‍ය ප්‍රකාශකවරයා මෙහිදී සඳහන් කර සිටියා.
ඒ, අනුව එම ස්ථානවල ආරක්ෂාව සදහා හමුදා නිලධාරීන් යෙදවීමට සිදුවන බව ද ඔහු මෙම මාධ්‍ය හමුවේ දී පැවසුවා.
එමෙන්ම ඡන්දය ප්‍රකාශ කිරීම අවසන් වූ පසු දිවයින පුරා මාර්ග බාධක 269ක් සහ ජංගම සංචාර 3,109ක් ක්‍රියත්මක කිරීමට සැලසුම් කර ඇති බවයි පොලිසිය වැඩිදුරටත් සඳහන් කර සිටියේ.
ඊට අමතරව දිවයින පුරා ක්‍රියාත්මකවන පරිදි කැරළි මර්ධන කණ්ඩායම් 241ක් සැලසුම් කර ඇති අතර, බුද්ධි නිලධාරීන් ද ආරක්ෂාව සඳහා යෙදවීමට නියමිත බව පොලිස් මාධ්‍ය ප්‍රකාශකවරයා මෙහිදී පවසා සිටියා.
