Rajapura Handi Oil
Rajapura Diabetic Powder

ඕමාන ජාතිකයෙක් මෙරට දී මරුට

ඕමාන ජාතිකයෙකු හදිසියේ ඇති වු රෝගි තත්ත්වයක් හේතුවෙන් දික්ඔය මුලික රෝහල වෙත ඊයේ (07) දින ඇතුළත් කළ අවස්ථාවේ ජීවිතක්ෂයට පත් ව තිබෙනවා.

අප ප්‍රාදේශීය වාර්තාකරු පැවසුවේ; මෙලෙස මියගොස් ඇත්තේ 34 හැවිරිදි අල් ජබිඩි අනි සලිම් සයිඩ් නමැති ඕමාන ජාතිකයෙක් බවයි.

මියගිය විදේශිකයා ඔහුගේ මිතුරන් දෙදෙනෙකු සමග වෛද්‍ය ප්‍රතිකාර සඳහා මෙරටට පැමිණ ඇති බවත්; එම තිදෙනා කොළඹ ප්‍රදේශයේ පිහිටි ප්‍රමුඛ පෙළේ පෞද්ගලික රෝහලක දී රුධිරය මාරු කර නුවරඑළිය සංචාරයක් සඳහා පැමිණ ආපසු කොළඹ දක්වා ගමන් කරමින් සිටියදි එම විදේශිකයා හදිසියේ රෝගාතුර වී ඇති බවයි.

ඉන් අනතුරුව ඔහුගේ මිතුරන් දෙදෙනා විසින් සිය සගයාව රෝහල්ගත කර තිබෙනවා.

මියගිය විදේශිකයා සහ ඔහුගේ මිතුරන් දෙදෙනා අද (08) දින කොළඹ පිහිටි පෞද්ගලික රෝහලේ සායන කටයුතු සඳහා ද පෙනී සිටීමට සූදානමින් සිටි බව ද පොලිසියට ප්‍රකාශ කෙරුණා.

ජීවිතක්ෂයට පත් විදේශිකයාගේ සිරුර සම්බන්ධයෙන් පශ්චාත් මරණ පරික්ෂණය පැවැත්විමෙන් අනතුරුව සිරුර මෙරට ඕමාන තානාපති කාර්යාලය වෙත භාරදෙන බවයි දික්ඔය මුලික රෝහලේ වෛද්‍යවරයා කියා සිටියේ.

සිද්ධිය සම්බන්ධයෙන් හැටන් පොලිසිය පරීක්ෂණ සිදු කරනවා.