ඉන්දියාවේ ඔඩීෂාහි දුම්රිය දෙකක් එකිනෙක ගැටීමෙන් සිදුවූ මාරාන්තික දුම්රිය අනතුරින් මියගිය සංඛ්‍යාව 280ක අධික බව විදෙස් මාධ්‍ය වාර්තා කරනවා.
මෙම සියවසේ ඉන්දියාවේ සිදුවූ දරුණුතම දුම්රිය අනතුර මෙය වන අතර, මරණ සංඛ්‍යාව තවදුරටත් ඉහළ යනු ඇතැයි අපේක්ෂා කරන බවයි ඉන්දීය බලධාරීන් සඳහන් කළේ.
මෙම මාරාන්තික අනතුරෙන් තවත් පුද්ගලයින් 900කට වැඩි පිරිසක් තුවාල ලබා ඇති බවද වාර්තා වනවා.
තුවාල ලැබූවන්ට ප්‍රතිකාර කිරීම සඳහා අතිරේක වෛද්‍යවරුන් 100 කට වැඩි පිරිසක් යොදවා ඇති බවයි ද ඉන්දීය මාධ්‍ය වාර්තා කරනවා.
මෙම දුම්රිය අනතුර සම්බන්ධයෙන් ඉන්දීය අග්‍රාමාත්‍ය නරේන්ද්‍ර මෝදි ප්‍රකාශ කළේ, මෙම සිදුවීමෙන් තමන් දැඩි ශෝකයට පත් වූ බවත්, තමාගේ සිතුවිලි විපතට පත් පවුල් සමඟ සිටින බවයි.
එමෙන්ම විපතට පත්වූ පුද්ගලයින්ට කඩිනම් සහන ලබාදීමට පියවර ගන්නා ලෙසට ද අග්‍රාමාත්‍යවරයා උපදෙස් ලබාදී තිබෙනවා.
මේ අතර අද දිනය ඔඩීෂා ප්‍රාන්තයේ ශෝක දිනයක් ලෙසට ප්‍රකාශයට පත් කර තිබෙනවා.
ඊයේ (02) රාත්‍රී 7.00 පමණ ෂලිමාර් සිට චෙන්නායි දක්වා ධාවනය වෙමින් තිබූ ‘කොරමැන්ඩල් එක්ස්ප්‍රස්’ දුම්රිය පිළී පැනීමකට ලක්ව එහි මැදිරි කිහිපයක් ප්‍රතිවිරුද්ධ දිශාවේ දුම්රිය මාර්ගයට වැටී තිබෙනවා.
අනතුරුව එම මාර්ගයේ යෙස්වාන්පූර් සිට හොව්රා වෙත ධාවනය වෙමින් තිබූ ‘සුපර් ෆාර්ස්ට් එක්ස්ප්‍රස්’ දුම්රිය ඒ මාර්ගයට වැටී තිබූ දුම්රිය මැදිරිවල ගැටී අනතුරට ලක්ව ඇති අතර, භාණ්ඩ ප්‍රවාහන දුම්රියක්ද පසුව එම දුමිරියේ ගැටී මෙම මාරාන්තික අනතුර සිදුව තිබෙනවා.
