දෙමළ ජාතික සන්ධානයේ නියෝජිතයන් පිරිසක් ජනාධිපති රනිල් වික්‍රමසිංහ හමුවී සාකච්ඡා කර තිබෙනවා.
පසුගියදා පැවති සර්ව පාක්ෂික හමුවේදී සාකච්ඡා වූ කරුණු ඉදිරියට සිදු කළ යුතු ආකාරය සම්බන්ධයෙන් අද සාකච්ඡාවේදී අවධානයට ලක්වූ බවයි දෙමළ සන්ධානයේ පාර්ලිමේන්තු මන්ත්‍රී එම්. ඒ. සුමන්තිරන් කියාසිටියේ.
අග්‍රාමාත්‍යවරයා විදේශ අමාත්‍යවරයා මෙන්ම අධිකරණ අමාත්‍යවරයා සහ නීතිපතිවරයා ද මෙම සාකච්ඡාවට එක්ව තිබෙනවා.
එමෙන්ම දෙමළ සන්ධානයෙන් පක්ෂ නායක ආර් සම්බන්ධන් සහ එම් ඒ සුමන්තිරන් එක්වූ අතර අමාත්‍ය ඩග්ලස් දේවානන්දා ද මෙම සාකච්ඡාවට එක්ව සිටි බව සඳහන්.
මෙම සාකච්ඡාවේදී දේශපාලන සිරකරුවන් නිදහස් කිරීම සම්බන්ධයෙන් මෙහිදී සාකච්ඡාවට ලක්වී ඇති අතර එහිදී අනාවරණ වී ඇත්තේ ඉන් 5 දෙනෙකු පමණ නිදහස් කිරීමට හැකියාව පවතින බවයි. අනෙක් පිරිස නිදහස් කිරීම සම්බන්ධයෙන් උපදෙස් ලබාදෙන බව නීතිපතිවරයා දන්වා තිබෙනවා.
එමෙන්ම උතුරේ ඉඩම් යළි හිමිකරුවන් වෙත නිදහස් කිරීම සම්බන්ධයෙන් ද මෙහිදී සාකච්ඡා වූ බවයි එම්. ඒ. සුමන්තිරන් මන්ත්‍රීවරයා සඳහන් කළේ.
එහිදී ප්‍රකාශ වී ඇත්තේ අදාළ ඉඩම් සම්බන්ධයෙන් යුද හමුදාව සමග සාකච්ඡා කර ඇති බවටයි.
ලබන ජනවාරි මස 3 වනදා පැවැත්වෙන ජාතික ආරක්ෂක මණ්ඩල රැස්වීමේදී මෙම ඉඩම් සම්බන්ධයෙන් යෝජනා ඉදිරිපත් කර ඒවා නිදහස් කිරීමට අවශ්‍ය පියවර ගන්නා බවටයි ප්‍රකාශ වී ඇත්තේ.
අනතුරුව අනෙකුත් ඉඩම් සම්බන්ධයෙන් සාකච්ඡා කළ යුතු බවට මෙම හමුවේදී තීරණය වී තිබෙනවා.
යළිත් ජනවාරි මස 5 වනදා ජනාධිපතිවරයා හමුවී සාකච්ඡා කිරීමට සූදානම් බවයි ඔහු කියාසිටියේ.
