මෙවර ඉන්දීය ප්‍රිමියර් ලීග් තරගාවලියේ සිය ගමන අතර මඟ අවසන් කරන්නට පන්ජාබ් කිංග්ස් කණ්ඩායමට ඊයේ (19) රාත්‍රියේ සිදු වුණා.
ඒ, ධර්මශාලා හිදී ඊයේ පැවති තරගයෙන් රාජස්ථාන් රෝයල්ස් කණඩායම හමුවේ කඩුලු 04ක පරාජයක් වැළඳගැනීමට සිදුවීමත් සමඟයි.
පන්ජාබ් කිංග්ස් කණ්ඩායම තරගාවලියේ මූලික වටයේ තරග 14කට ක්‍රීඩා කරමින් ඉන් තරග 06ක් ජයගෙන තරග 08ක් පරාජය වී මෙවර තරගාවලියට අවසන් කළා.
මේ අතර ඊයේ පැවති තරගය ජයගත් රාජස්ථාන් ක්‍රීඩකයින් ප්‍රසාද ලකුණු සටහනේ එක් ස්ථානයක් ඉරිදියට පැමිණීමට සමත් වූ අතර, මේ වනවිට ඔවුන් එහි 05වන ස්ථානයේ රැඳී සිටිනවා.
කෙසේ වෙතත් ඔවුන්ට ද සුපිරි හතරදෙනාගේ වටයට පිවිසීමේ අවස්ථාව ඇත්තේ ඉතා සුළු වශයෙන් වීමද විශේෂත්වයක්.
තරගාවලියේ මේ වනවිට සුපිරි හතරදෙනාගේ වටයේ තම ස්ථානය කල්වේලා ඇතිවම වෙන්කර ගැනීමට ගුජරාට් ටයිටන්ස් කණ්ඩායම සමත්ව ඇත්තේ, ඉතිරි ස්ථාන තුන සඳහා කණ්ඩායම් හතරක් අතර තියුණු සටනක් නිර්මාණය කරමින්.
මේ අතර තරගාවලියේ තවත් තියුණු තරග දෙකක් අද (20) පැවැත්වෙන්නේ දිල්ලි නුවර සහ කොල්කටා හී ඊඩ්න් ගාර්ඩන් ක්‍රීඩාංගනවලදීයි.
ඒ, අනුව අද (20) දිනයේ පළමු තරගය ලෙස දිල්ලි කැපිටල්ස් සහ චෙන්නායි සුපර් කිංග්ස් තරගය පැවැත්වෙන අතර, අද රාත්‍රියේ පැවැත්වෙන්නේ කොල්කටා නයිට් රයිඩර්ස් සහ ලක්නව් සුපර් ජයන්ට්ස් අතර තරගයයි.
චෙන්නායි පිළට සහ ලක්නව් පිළට අද සහභාගීවන තරග දෙකේ ජයග්‍රහණයන් වැදගත් වන්නේ ඔවුන් සුපිරි හතර දෙනා අතර රැඳී සිටින ස්ථානය තීරණය කිරීම සඳහායි.
මෙම කණ්ඩායම් දෙක අද (20) පැවැත්වෙන තරගවලින් පරාජය වී හෙට (21) දිනයේ පැවැත්වෙන තරග දෙකෙන් මුම්බායි ඉන්දියන්ස් සහ රෝයල් චැලෙන්ජස් යන කණ්ඩායම් ජයගතහොත් චෙන්නායි සහ ලක්නව් කණ්ඩායම්වලට මෙවර තරගාවලියෙන් ඉවත්ව යෑමට සිදුවනවා.
