මායවට්ටපෙරිල්ලවෙලි ප්‍රදේශයේ මාවෙට්ටුවාන් වැව් බැම්ම ඉදිකිරීම සඳහා මුල්ගල තැබීමේ අවස්ථාවට සහභාගි වීමට නියමිතව සිටි පාර්ලිමේන්තු මන්ත්‍රී සිවනේසතුරෙයි චන්ද්‍රකාන්තන් (පිල්ලෙයාන්) මහතාට ශ්‍රී ලංගම බස් රියදුරු වැඩෙත් කරන්නට සිදුවී ඇත.
එම උත්සවයට සහභාගිවීමට පැමිණෙමින් සිටි පිරිසක් රැගත් එම ශ්‍රී ලංගම බස් රථය උත්සව භූමියට කිලෝ මීටර් 20 ක් පමණ දුරකින් නතර කෙරිණි.මාර්ගයේ අබලන් තත්වය නිසා මින් ඉදිරියට බස් රථය ධාවනය කිරීමට නොහැකි බව පවසා රියැදුරා නතර කර තිබේ. එම මාර්ගයේ උත්සවයේ ප්‍රධාන ආරාධිත අමුත්තා වශයෙන් සහභාගි වීමට පැමිණි සිවනේසතුරෙයි මහතා බස් රථය නවතා ඇත්තේ ඇයි දැයි සොයා ඇති අවස්ථාවේදී මාර්ගයේ අබලන් තත්වය නිසා බසය නතර කර ඇති බව දැන ගන්නට ලැබී ඇත.වහාම ක්‍රියාත්මක වූ පාර්ලිමේන්තු මන්ත්‍රීවරයා ශ්‍රී ලංගම බසයේ රියැදුරු අසුනට නැග උත්සවයට සහභාගි වෙමින් සිටි පිරිස පැමිණි බස් රථය උත්සවය පැවැති ප්‍රදේශය වෙත ධාවනය කර තිබේ. මෙම පිරිස ඉතා ආරක්ෂාකාරීව රැගෙන යන බව පාර්ලිමේන්තු සිවනේසතුරෙයි චන්ද්‍රකාන්තන් මහතා පවසා ඇත.
