රට පුරා ඇති ඉන්ධන පිරවුම්හල් පරීක්ෂා කිරීමට පොලීසිය සහ පාරිභෝගික කටයුතු අධිකාරිය පියවර ගනු ඇති බව ප්‍රවාහන රාජ්‍ය අමාත්‍ය දිලුම් අමුණුගම මහතා පැවසීය.
ඔහු පෙන්වා දෙන්නේ මිල වැඩිවීමක් සිදුවේයැයි අපේක්ෂාවෙන් ඇතැම් ඉන්ධනහල් ඉන්ධන සඟවාගෙන සිටිය හැකි බවය.
“අපි රට පුරා පොලීසියත් පාරිභෝගික කටයුතු අධිකාරියත් හරහාත් පරීක්ෂා කරනවා ඇත්තටම ඉන්ධන ඉවර වෙලා ද? නැත්තම් මිල වැඩිකිරීමක් බලාපොරොත්තුවෙන් සඟවගෙන ඉන්නවා ද? කියලා. ඊයේ දිනයේ පෝලිම් තිබුණා. ඒ පෝලිම්වල සියලුදෙනාටම ඉන්ධන සැපයුවා. ඒ කියන්නේ සියලුදෙනාටම ඉන්ධන ලැබෙනවා නම් ඉන්ධන හිඟයක් ඇතිවෙලා නෑ. නමුත් නොයෙකුත් තැන්වල මිල වැඩි කරයි කියන අදහස මත ඉන්ධන සඟවාගෙන ඉන්න පුළුවන්.”
“තවමත් ලංගමවත් පෞද්ගලික බස් රථවත් ණයට ඉන්ධන ලබාගන්නේ නෑ. ගෙවලා ඉන්ධන ගන්න අයට ප්‍රශ්නයක් තියෙනවා කියලා තවම අපිට දන්වලා නෑ. ඉන්ධන රටට ගෙන්වීම ප්‍රමාද වුණොත් බස් කර්මාන්තයට බලපායි.”
“සමහර අය භූමිතෙල් ටිකකුත් දානවා. නමුත් මං හිතන්නේනෑ භූමිතෙල් සම්පූර්ණයෙන් දාලා දුවන්න පුළුවන් වෙයි කියලා.”
“ඇමතිවරයාට වගකීමක් තිබෙනවා රටට අවශ්‍ය ඉන්ධන ප්‍රමාණය පවත්වාගෙන යන්න. අපි විශ්වාස කරනවා ඒ අය ඒ අයගෙ වැඩේ කරයි..අපේ වැඩේට බාධාවක් නොවන ලෙස කියලා.”
