නැඟෙනහිර කොළඹ මූලික රෝහලේ සිසේරියන් සැත්කමක් සිදුකෙරෙමින් තිබියදී එහි ජෙනරේටරය නතර වීම නිසා ජංගම දුරකථනයේ ටෝච් එළි භාවිත කරමින් එම සැත්කම සාර්ථකව නිම කර මවත් දරුවාත් බේරාගැනීමට වෛද්යවරු ඇතුළු සෞඛ්ය කණ්ඩායම සමත් වූ පුවතක් මුල්ලේරියාව මූලික රෝහලෙන් වාර්තා වේ.
නාරි හා ප්රසවවේදය පිළිබඳ විශේෂඥ වෛද්ය කේ. කෝදාගොඩ මහතාගේ ප්රධානත්වයෙන් යුත් කණ්ඩායම මෙම සැත්කම කිරීම ආරම්භ කර ඇත්තේ ඉකුත් 4 වැනිදා පෙරවරුවේය.
ඒ වනවිටත් මුල්ලේරියාව ප්රදේශයට විදුලිය නොතිබූ අතර රෝහලේ ජෙනරේටරයෙන් රෝහලට විදුලිය සැපයෙමින් තිබිණි. ජෙනරේටරයෙන් විදුලිය සපයද්දී වායුසමන යන්ත්ර ක්රියාත්මක නොවන බැවින් ශල්යාගාරය වායුසමනය කර තිබුණේද නැත. ගැබිනි මවගේ ඉණෙන් පහළ කොටස හිරිවට්ටා මෙම සිසේරියන් සැත්කම සිදුකිරීමට පියවර ගෙන තිබූ අතර විශේෂඥ වෛද්යවරු දෙදෙනෙක්, වෛද්යවරුන් කිහිපදෙනෙක්, හෙද හෙදියන් හා කනිෂ්ඨ කාර්ය මණ්ඩලයේ පිරිසක්ද එහි සිටියහ. සැත්කම සිදුකර බිලිඳා බිහිකර මවගේ කැපුම් තුවාල මසන්නට වෛද්යවරයා සැරසෙන මොහොතේ ජෙනරේටරයද නැවතිණි. ඒ වන විට මවගේ කැපුම් තුවාල මසා තිබී නැත.
ශල්යාගාරය අඳුරේ පැවැතිණි. එපමණක් නොවේ, එහි විදුලියෙන් ක්රියාත්මක වන කිසිදු උපකරණයක් ක්රියාත්මක නොවීය. ඒ මොහොත මවත් දරුවාත් ඉතා අවදානම් අඩියක සිටින මොහොතකි. වහා ක්රියාත්මක වූ වෛද්ය කණ්ඩායම හැකි අන්දමින් සැත්කම ඉවර කරන්නට තීන්දු කළහ. කනිෂ්ඨ කාර්ය මණ්ඩලය තම අත ඇති දුරකථනයන්හි ටෝච් දැල්වූහ. වෛද්ය කෝදාගොඩ සැත්කම අවසන් අදියර දිගටම කරගෙන ගියේය. එම කණ්ඩායමේ දස්කමින් මේ වන විට මවත් දරුවාත් නිරුපද්රිතව සිටින බව රෝහල් කනිෂ්ඨ කාර්ය මණ්ඩලයේ සාමාජිකයෙක් පැවැසීය.
විශේෂයෙන් රුධිර වහනය වීම නැවැත්වීමට භාවිත කරන උපකරණය විදුලිය නොමැතිව ක්රියාත්මක නොවන බවත් එහිදී කෙසේ හෝ එම කණ්ඩායමේ දක්ෂතාව හේතුවෙන් සිදුවන්නට ගිය අනතුරක් වැළකී ගිය බවත් හෙතෙම කියා සිටියේය. මෙවැනි අවස්ථාවක රෝහලේ ප්රයෝජනය සඳහා තවත් ජෙනරේටරයක් තිබුණේ නම් ඉතා වටිනා බවද ඔහු සඳහන් කළේය.
එම උතුම් මෙහෙවර ඉටු කළ කාර්ය මණ්ඩලය ට අපගේ ප්රණාමය.
ම්නිසත්බව පෙන්වාදුන් මිනිසුන්හට උත්තමාචාරය .