“වහලයේ මුළු පරාල දෙකේ ඇදය ඇරීම සඳහා කඹයක් දමා මහින්ද බාස්උන්නැහේ සහ ඔහුගේ පුතා කඹය ඇද්දා. ඒ සමඟ කඹය කඩාගෙන සිවිලිම් තහඩුත් කඩාගෙන ගොස් මේ දෙදෙනා බිමට වැටුණා” යැයි වහලයකින් ඇද වැටීමෙන් මියගිය වඩු කාර්මිකයකුගේ හදිසි මරණ පරීක්ෂණයේදී සාක්ෂි දෙමින් ඔහුත් සමඟ වැඩ කළ වඩු කාර්මිකයකු වන විදානගම ආරච්චිගේ බන්දුසේන (56) නමැත්තා පවසනවා.
මියගොස් ඇත්තේ මහින්ද කොඩිතුවක්කු (57) නමැති පොල්කොරටුව බණ්ඩත්තර, තිහගොඩ ප්රදේශයේ පදිංචිකරුවෙක්. මොහුගේ පුතුද වහලයෙන් ඇදවැටීමෙන් තුවාල ලබා තිබෙනවා. මියගිය වඩු කාර්මිකයාගේ හදිසි මරණ පරීක්ෂණය ගාල්ල කරාපිටිය ශික්ෂණ රෝහලේ අතිරේක හදිසි මරණ පරීක්ෂක චන්ද්රසේන ලොකුගේ විසින් ගාල්ල කරාපිටිය ශික්ෂණ රෝහලේදී සිදු කර තිබෙන බවත් සඳහන්.
සාක්ෂිකරු තවදුරටත් මෙසේද කියා සිටියා, “මා මහින්ද බාස්උන්නැහේ සමඟ වසර 15ක සිට එකට වඩු වැඩ කරනවා. ඔහුගේ නිවෙස අසල වහලයක් ගැසීම සඳහා මහින්ද කොන්ත්රාත්තුවක් ලබාගෙන තිබුණා. මහින්දගේ පුතා කුලියාපිටිය ඉන්ජිනේරු පීඨයේ සිසුවෙක්. නිවාඩු නිසා ඔහුත් පියා සමඟ වැඩට එනවා. දෙමහල් නිවෙසක ඉහළ මාලයේ ටැංකි වහලයේ මුළු පරාල දෙකේ ඇද ඇරීම සඳහා කඹයක් දමලා තද කොට කඹය ඇද්දා. ඒ සමඟ කඹය කඩාගෙන වහලයෙන් බිමට වැටුණා. මහින්ද බාස්උන්නැහේගේ පුතා බුදු තාත්තේ කියාගෙන කැගැසුවා. පුතාගේ කොඳුනාරටියට තුවාල වී තියෙනවා. මහින්ද කරාපිටිය රෝහලට ඇතුළත් කිරීමෙන් පසු මියගොස් ඇති බව දැන ගත්තා.”
පශ්චාත් මරණ පරීක්ෂණය විශේෂඥ අධිකරණ වෛද්ය නිලධාරි අජිත් රත්නවීර කළ අතර වහලයෙන් ඇද වැටීමෙන් හිසට හා පපුවටවූ බහුවිධ තුවාල හේතුවෙන් මරණයවී ඇති බවට තීන්දු කළා
