විලියම් කුමරු‌ගේ ඉන්දීය සංචාරයට වේල්සයේ කුමරිය කේට් මිඩිල්ටන් ද එක්වේ

එක්සත් රාජධානියේ විලියම් කුමරුගේ ඉන්දීය සංචාරයට, ඔහුගේ භාර්යාව වන වේල්සයේ කුමරිය කේට් මිඩිල්ටන් ද එක්වනු ඇති බවට වාර්තාවේ.

බ්‍රිතාන්‍යයේ වේල්ස් කුමරිය වන කේට්, පිළිකා රෝගය සඳහා ප්‍රතිකාර ලැබීමෙන් පසු සිදු කරන විශාලතම විදේශ සංචාරය මෙය වනු ඇති බව සඳහන් වෙනවා.

ඇය මෙම සතියේ ඉන්දියාවේ පැවැත්වෙන ‘අර්ත්ෂොට් ත්‍යාග’ (Earthshot Prize) ප්‍රදානෝත්සවයට සහභාගී වන තම සැමියා වන විලියම් කුමරු සමඟ එක්වනු ඇති බවට වාර්තාවෙනවා.

සිහසුනට උරුමකම් කියන 44 හැවිරිදි විලියම් කුමරු සහ කේට් කුමරිය, දින තුනක සංචාරයක් සඳහා මුම්බායි වෙත පැමිණෙන අතර, එහිදී විවිධ වැඩසටහන් මාලාවකට සහභාගී වීමට නියමිතයි. අඟහරුවාදා පැවැත්වෙන සම්මාන ප්‍රදානෝත්සවයක් ද ඊට ඇතුළත් වෙනවා.

44 හැවිරිදි කේට් කුමරියට අනුව, 2024 වසරේදී නිශ්චිතව හඳුනා නොගත් පිළිකා තත්ත්වයක් සඳහා වැළැක්වීමේ රසායනික චිකිත්සාව (preventative chemotherapy) ලබා ගැනීමෙන් පසු ඇය සිදු කරන වඩාත්ම වැදගත් විදේශ සංචාරය මෙයයි. ඇයගේ රෝගී තත්ත්වය මේ වන විට පාලනය වී (remission) තිබුණද, එම රෝගය තවමත් තම ජීවිතයට බලපෑම් කරන බව ඇය ප්‍රකාශ කරනවා.

තම පියා වන චාල්ස් රජු මෙන්ම, පරිසරය වෙනුවෙන් පෙනී සිටීම තම ප්‍රධාන අරමුණු අතරින් එකක් කරගෙන සිටින විලියම් කුමරු, දේශගුණික විපර්යාස සඳහා විසඳුම් සෙවීමේ අරමුණින් 2020 වසරේදී ‘අර්ත්ෂොට් ත්‍යාගය’ (Earthshot Prize) ආරම්භ කළා. මෙම සම්මානය යටතේ ජයග්‍රාහකයින් පස් දෙනෙකුට, ඔවුන්ගේ ව්‍යාපෘති පුළුල් කිරීම සඳහා එක් අයෙකුට පවුම් මිලියනයක් (ඇමරිකානු ඩොලර් මිලියන 1.3ක්) බැගින් පිරිනමනු ලබනවා.

කෙන්සිංටන් මාලිගයේ පිහිටි ඔවුන්ගේ කාර්යාලයේ ප්‍රකාශකයෙකු පැවසුවේ, “විලියම් කුමරුට අනුව, ‘අර්ත්ෂොට්’ යනු අවසාන වශයෙන් ගත් කල, අශුභවාදී ආකල්ප වෙනුවට යහපත් හැකියාවන් පිළිබඳ බලාපොරොත්තුවක් ඇති කිරීමයි,” යනුවෙනි.

“අපගේ ග්‍රහලෝකය මුහුණ දෙන පාරිසරික අභියෝග බරපතල වුවද, ඒවා විසඳීම සඳහා යොදා ගැනෙන දක්ෂතාව, අධිෂ්ඨානය සහ නිර්මාණශීලිත්වය ද ඊට නොදෙවෙනි ලෙස බලවත් බව පෙන්වා දීම මෙහි අරමුණයි.” ඔහු තවදුරටත් ප්‍රකාශ කරයි.

මෙතෙක් පැවති විශාලතම සම්මාන උළෙල ලෙස සංවිධායකයින් හඳුන්වන මෙම උත්සවයට, ඉන්දීය ක්‍රිකට් ක්‍රීඩා ක්ෂේත්‍රයේ දැවැන්තයෙකු වන සචින් තෙන්ඩුල්කාර්, රංගන ශිල්පීන් වන ආලියා භාත් සහ රාමි මාලෙක් මෙන්ම, ඉන්දියාවේ සිය පළමු ප්‍රසංගය ඉදිරිපත් කිරීමට නියමිත බ්‍රිතාන්‍ය පොප් සංගීත කණ්ඩායමක් වන ‘ටේක් දැට්’ (Take That) ඇතුළු ප්‍රසිද්ධ පුද්ගලයින් රැසක් එක්වෙන බව වාර්තාවෙනවා.

‘අර්ත්ෂොට්’ (Earthshot) වැඩසටහනට අමතරව, රාජකීය පවුලේ සාමාජිකයින් ඉන්දියානු ක්‍රිකට් ක්‍රීඩාව, විලාසිතා සහ සිනමාවට සම්බන්ධ උත්සව කිහිපයකට ද සහභාගී වීමට සැලසුම් කර තිබෙනවා.

තමන්ට වැළඳුණු රෝගී තත්ත්වය හේතුවෙන්, කේට් තම නිල රාජකාරි කටයුතු සැලකිය යුතු ලෙස අඩු කර ගෙන ඇති අතර, ඇය ප්‍රකාශ කරන්නේ, තමන් දවසින් දවස තත්ත්වය අනුව කටයුතු කරන බවයි. ඇය මහජනයා හමුවට පැමිණීම ක්‍රමයෙන් වැඩි වී තිබුණ ද, මීට පෙර විලියම් සමඟ විදේශ සංචාර සඳහා ඇය එක් වී නොතිබුණා.

2024 වසරේ සිට ඇය සිදු කළ එකම ප්‍රධාන විදේශ සංචාරය සිදු වූයේ මැයි මාසයේදී ය. කුඩා දරුවන්ගේ මුල් අවධියේ සංවර්ධනය පිළිබඳ ඇයගේ කාර්යයන්හි කොටසක් ලෙස, ඇය දින දෙකක කාලයක් සඳහා තනිවම ඉතාලියට ගොස් තිබුණා.

ඒ අතර, වේල්සයේ කුමරිය වන කේට්ගේ ප්‍රධානත්වයෙන්, වාර්ෂික රාජකීය නත්තල් සම්ප්‍රදායක් මේ වසරේදී යළි පැවැත්වීමට නියමිත බවටත් වාර්තාවෙනවා.

දෙසැම්බර් 11 වන දින වෙස්ට්මිනිස්ටර් ඇබේ (Westminster Abbey) හිදී කේට් විසින් වාර්ෂික නත්තල් ගීතිකා දේව මෙහෙය (Christmas carol service) පවත්වනු ලබන බව කෙන්සිංටන් මාලිගය සිකුරාදා නිවේදනය කළා.

මෙවර දේව මෙහෙය මගින් “ආදරය, කරුණාව සහ එකිනෙකා ගැන සැලකිලිමත් වීමේ වැදගත්කම ඉස්මතු කෙරෙනු ඇති අතර, මිනිසුන් තම පවුල්, ප්‍රජාවන් සහ එදිනෙදා ජීවිතය තුළ එකිනෙකාට සහයෝගය දක්වන පරිසරයන් ගොඩනඟා ගන්නා විවිධ ආකාර පිළිබඳව අවධානය යොමු කරනු ඇතැයි” රාජකීය මාලිගය නිකුත් කළ නිවේදනයක සඳහන් වෙනවා.