ලබන නොවැම්බර් 03 වැනිදා විවාදයට ගැනීමට නියමිතව තිබූ, කතානායක වෛද්‍ය ජගත් වික්‍රමරත්නට එරෙහිව විපක්ෂය විසින් ඉදිරිපත් කළ ප්‍රතිශෝධිත විශ්වාසභංග යෝජනාව පිළිබඳ විවාදය එදින නොපැවැත්වීමට තීරණය කළ බව සභානායක බිමල් රත්නායක පවසනවා.
නොවැම්බර් පළමු සතියට නියමිතව ඇති පාර්ලිමේන්තු කටයුතුවල සිදුවූ වෙනස්වීම් පිළිබඳ දැනුම් දෙමින් සභානායකවරයා මේ බව සඳහන් කළා.
අදාළ විශ්වාසභංග යෝජනාව විපක්ෂය විසින් ස්ථාවර නියෝගවලට අනුව ඉදිරිපත් කර නොතිබීම හේතුවෙන් නොවැම්බර් 03 වන දිනට මෙය විවාදයට නොගන්නා බවයි ඔහු වැඩිදුරටත් සඳහන් කළේ.
සභානායකවරයා මෙහිදී වැඩිදුරටත් සඳහන් කර සිටියේ, කතානායකවරයාට එරෙහිව විශ්වාසභංග යෝජනාවක් ස්ථාවර නියෝගවලට අනුව භාරදෙන්නේ නම්, එය අයවැය කාලයට පෙර විවාද කිරීමට හැකි බව පාර්ලිමේන්තු කටයුතු පිළිබඳ කාරක සභාවේ දී දැනුම් දුන් බවයි.
