මුල් ආකෘතිය වෙනස් කර ඇති සහ ලියාපදිංචි නොකළ එන්ජින් ධාරිතාවට වඩා වැඩි ධාරිතාවකින් යුත් යතුරුපැදි සම්බන්ධයෙන් දැඩි නීතිමය ක්‍රියාමාර්ග ගන්නා ලෙස රථවාහන නිලධාරීන්ට උපදෙස් ලබා දී ඇති බව රථ වාහන පාලන හා මාර්ග ආරක්ෂාව දිසාව භාර නියෝජ්‍ය පොලිස්පති ඩබ්ලිව්.පී.ජේ. සේනාධීර පවසනවා.
අද (13) පෙරවරුවේ මාධ්‍ය හමුවක් පවත්වමින් නියෝජ්‍ය පොලිස්පතිවරයා මේ බව සඳහන් කළා.
මේ අතර වයස අවුරුදු 18ට අඩු පුද්ගලයින්ට හෝ රියදුරු බලපත්‍රයක් නොමැති පුද්ගලයින්ට වාහන ලබාදෙන දෙමාපියන් ඇතුළු වගකිවයුතු පුද්ගලයින්ට එරෙහිව ද දැඩිව නීතිය ක්‍රියාත්මක කරන බවයි ඔහු මෙහිදී පැවසුවේ.
එමෙන්ම මෙම වසරේ මේ දක්වා මාර්ග අනතුරු 1,605ක් වාර්තා වී ඇති අතර, එම අනතුරුවලින් පුද්ගලයින් 1,693 දෙනෙකු මියගොස් ඇති බව ඔහු සඳහන් කළා.
මියගිය පුද්ගලයින් අතර පදිකයින් 555 දෙනෙකු, යතුරුපැදිකරුවන් 603 දෙනෙකු, පසුපැදිකරුවන් 119 දෙනෙකු, පාපැදිකරුවන් 115 දෙනෙකු, රියදුරන් 136 දෙනෙකු සහ මගීන් 162 දෙනෙකු සිටින බවයි ඔහු වැඩිදුරටත් පැවසුවේ.
