දෙහිවල පොලිස් වසමේ කඩවත පාර ප්‍රදේශයේ දී පසුගිය 04 වනදා පුද්ගලයෙකුට වෙඩි තබා ඝාතනය කිරීමට තැත් කිරීමේ සිද්ධියේ වෙඩික්කරු ලෙස කටයුතු කළ පුද්ගලයා අත්අඩංගුවට ගෙන තිබෙනවා.
අතුරුගිරිය, හබරකඩ ප්‍රදේශයේ දී මෙම සැකකරු ඊයේ (09) ජයවර්ධනපුර පොලිස් විශේෂ කාර්ය බලකා කඳවුරේ නිලධාරීන් විසින් අත්අඩංගුවට ගෙන ඇති බවයි වාර්තා වුණේ.
හෝමාගම ප්‍රදේශයේ පදිංචිකරුවෙක් වන මෙම සැකකරු 23 හැවිරිදි වියේ පසුවන පුද්ගලයෙක්.
අත්අඩංගුවට ගැනුණු සැකකරු දෙහිවල පොලිස් ස්ථානය වෙත භාර දී තිබෙනවා.
දෙහිවල, කඩවත පාරේ දහනායක ක්‍රීඩාංගනය අසලදී බේකරි හිමිකරුවෙකු ඉලක්ක කර මෙම වෙඩි තැබීම සිදුකිරීමට උත්සාහ කර ඇති අතර, එහිදී වෙඩික්කරුගේ ගිනි අවිය ක්‍රියාත්මක නොවීම හේතුවෙන් බේකරි හිමිකරු වහාම ක්‍රියාත්මක වී වෙඩික්කරු සමඟ පොරබැඳ ගිනි අවිය සිය භාරයට ගෙන එම අපරාධය ව්‍යර්ථකර තිබෙනවා.
