මැයි මාසයේ ඉන්ධන ආනයන සඳහා ඇමරිකානු ඩොලර් මිලියන 522ක් වැයවන බවට ගණන් ලබා ඇති බව ජනධිපති අනුර කුමාර දිසානායක සඳහන් කළා.
නුවරඑළිය දිස්ත්රික් විශේෂ සම්බන්ධීකරණ කමිටු රැස්වීමට එක් වෙමින් ජනාධිපතිවරයා අද (13) මේ බව පැවසුවා.
මෙහිදී වැඩිදුරටත් අදහස් දක්වමින් ජනාධිපතිවරයා පැවසුවේ ගතවූ පෙබරවාරි මාසයේ දී ඉන්ධන ආනයනය සඳහා ඩොලර් මිලියන 98ක් වැය වී ඇති බවයි.
එමෙන්ම ගතවූ මාර්තු සහ අප්රේල් මාසවල ඉන්ධන ආනයනට පිළිවෙලින් ඩොලර් මිලියන 216ක් සහ ඩොලර් මිලියන 318ක් වැය වී ඇති බවයි ඔහු පැවසුවේ.
ඒ, අනුව පසුගිය පෙබරවාරිය හා සැසදීමේ දී මේ වනවිට හය ගුණයකට ආසන්න ප්රමාණයකින් ඉන්ධන ආනයන සඳහා වියදම දැරීමට සිදුව ඇති බව ජනාධිපතිවරයා මෙහිදී පැවසුවා.
මේ අතර ඩීසල් ලීටරයක් මේ වනවිට රුපියල් 720ක් වැනි මිලක් වන බවත්, එසේ වුවද ඩීසල් ලීටරයක් රුපියල් 392ක් වැනි මුදලකට මහජනතාවට ලබාදෙන බවයි ජනාධිපතිවරයා සඳහන් කර සිටියේ.
එහිදී සෑම ඩීසල් ලීටරයකටම රුපියල් 100ක වැය බරක් රජය විසින් ගෙවනු ලබන බව සඳහන් කළ ජනාධිපතිවරයා, ඒ අනුව තෙල් සංස්ථාවට ඩීසල් ලීටරයකට හිමිවන්නේ රුපියල් 492ක මුදලක් බවයි ඔහු පැවසුවේ.
ඒ, අනුව ඩීසල් ලීටරයකින් තෙල් සංස්ථාවට විශාල පාඩුවක් දැරීමට සිදුව ඇති බව ජනාධිපතිවරයා මෙහිදී වැඩිදුරටත් අවධාරණය කළා.
