ඊයේ (21) රාත්‍රියේ සිට ඇද හැලුණු අධික වර්ෂාපතනය හේතුවෙන් කින්නියා, මුතූර්, සේරුවිල, වැලිකන්ද, ලංකාපුර, තමන්කඩුව සහ දිඹුලාගල ප්‍රාදේශීය ලේකම් කොට්ඨාශවල මහවැලි ගඟ අසල පහත් බිම් ප්‍රදේශ සඳහා ඉදිරි පැය 24 සඳහා සුළු ගංවතුර අනතුරු ඇඟවීමක් නිකුත් කර තිබෙනවා.
මඩකලපුව-පොළොන්නරුව මාර්ගයේ ගල්ලෑල්ලේ, සෝමාවතිය රජමහා විහාරයට පිවිසෙන මාර්ගයේ සහ සෝමාවතිය විහාරස්ථානය අවට ප්‍රදේශවල ද සුළු ගංවතුර ඇතිවීමේ අවදානමක් පවතිනවා.
වාරිමාර්ග දෙපාර්තමේන්තුව දැනුම් දෙන්නේ ඒ හේතුවෙන් ඉදිරි දින කිහිපය පසුවන තෙක් පුදබිමට පැමිණෙන බැතිමතුන් ඒ පිළිබද සැළකිළිමත්ව පසුං ලෙසයි.
මෙම කලාපවල මහවැලි ගඟ අසල ජීවත් වන පදිංචිකරුවන්ට ද ප්‍රවේශම් වන ලෙස උපදෙස් දී තිබෙනවා.
ඊට අමතරව රත්නපුර, තල්ගහගොඩ/ඌරාව සහ මනම්පිටිය ප්‍රදේශයෙන් කළු, නිල්වලා සහ මහවැලි ගංගා දැනට “අනතුරු ඇඟවීමේ” මට්ටම්වල පවතින බව වාරිමාර්ග දෙපාර්තමේන්තුව සඳහන් කරනවා.
මේ අතර, මහනුවර, කෑගල්ල, මාතලේ සහ රත්නපුර දිස්ත්‍රික්කවල ප්‍රාදේශීය ලේකම් කොට්ඨාස 16ක නායයෑම් පිළිබඳ රතු නිවේදන නිකුත් කර තිබෙනවා.
එමෙන්ම අධික වැසි සමඟ මහනුවර ප්‍රදේශයේ මාර්ග කිහිපයක ගමනා ගමනයට බාධා එල්ල වී ඇති බවයි ආපදා කළමනාකරණ මධ්‍යස්ථානය සඳහන් කළේ.
