පාකිස්ථානය සමඟ තරගය ජයගත් ඉන්දීය නායකයාගෙන් ඉල්ලීමක්

ආසියානු කුසලාන 20-20 තරගාවලියේ සුපිරි හතර වටයේ ඉන්දියාව සහ පාකිස්ථාන අතර තරගය ඊයේ (21) අවසන් වුණේ ඉන්දියාවට ජය හිමිකර දෙමින්.

මෙවර තරගාවලියේ කණ්ඩායම් දෙක එකිනෙකා හමුවූ මූලික වටයේ තරගයේ දී ඇති වූ අර්බුදකාරී තත්ත්වය හේතුවෙන් මෙම තරගය ද ආරම්භයේ සිටම ඉතා තියුණු මුහුණුවරක් ගනු ලැබුවා.

මෙම තරගයේ පළමුව පන්දුවට පහර දුන් පාකිස්ථානය කඩුලු 05ක් දැවී ලකුණු 171ක් රැස් කළ අතර, අනතුරුව ඉන්දීය කණ්ඩායමට ලැබුණු 172ක ඉලක්කය පන්දුවාර 18යි පන්දු 05ක් තුළ කඩුලු 04ක් පමණක් දැවී පසුකර යමින් මෙම තරගය ජයගත්තා.

ඒ, අනුව මෙම තරගයෙන් ඉන්දියාවට කඩුලු 06ක ජයග්‍රහණයක් හිමිවුණා.

ඩුබායි හිදී පැවති මෙම තරගයෙන් අනතුරුව පැවැත්වූ මාධ්‍ය හමුව සඳහා ඉන්දීය නායක සූර්යකුමාර් යාදව් එක්ව සිටියා.

එහිදී සූර්යකුමාර් යාදව් ඉල්ලා සිටියේ, ඉන්දියාව සහ පාකිස්ථාන අතර තරග ජාතීන් දෙක අතර එදිරිවාදී තරගයක් ලෙස හැඳින්වීම නවත්වන ලෙසයි.

මේ අතර පකිස්ථාන නායක සල්මන් ආඝා මෙම මාධ්‍ය හමුවට එක්වෙමින් සඳහන් කර සිටියේ තම පන්දු යවන්නන්ට ඉන්දීය ආරම්භක පිතිකරුවන් පාලනය කළ නොහැකි වූ බවයි.

එය මෙම තරගයේ පරාජයට ප්‍රධාන හේතුවක් වූ බවයි සල්මන් ආඝා වැඩිදුරටත් සඳහන් කළේ.