අතුරුදන් වූ නඩු ලේඛන හමු වූ බව අල්ලස් කොමිසම අධිකරණයට දැනුම්දෙයි

අස්ථානගත ව තිබූ හිටපු අමාත්‍ය ප්‍රියංකර ජයරත්න ඇතුළු විත්තිකරුවන් දෙදෙනකුට එරෙහිව පවරා තිබූ නඩුවේ සියලු ලේඛන යළි සොයාගැනීමට හැකි වූ බව අල්ලස් හෝ දූෂණ කොමිෂන් සභාව වෙනුවෙන් පෙනී සිටින නීතිඥවරිය අද (19) කොළඹ මහාධිකරණ විනිසුරු මංජුල තිලකරත්න මහතාට දැනුම්දුන්නා.

එකී ලේඛනවලින් කොටසක් අල්ලස් හෝ දූෂණ විමර්ශන කොමිෂන් සභාවේ ලේඛනාගාරයේ තිබියදීත්, තවත් කොටසක් අමාත්‍යාංශයක් වෙත යොමු කර තිබියදීත් සොයා ගැනීමට හැකි වූ බවයි එම නීතිඥවරිය වැඩිදුරටත් පෙන්වාදුන්නේ.

සතියක කාලයක් ඇතුළත තම අධිකරණයේ නඩු භාණ්ඩ ගබඩාවේ භාරකරු වෙත අදාළ ලේඛන නිසි ආකාරයට භාරදීමටත්, සති දෙකක් ඇතුළත කාලයක දී ඒවායේ ඡායාස්ථ පිටපත් විත්තියට භාරදීමට පියවර ගන්නා ලෙසත් මහාධිකරණ විනිසුරුවරයා අදාළ නීතිඥවරියට නියෝග කළා.

එකී ලේඛන අස්ථානගත වී ඇති බව පෙර නඩු දිනයේ දී දැනුම්දෙනු ලැබුවේ ද අල්ලස් හෝ දූෂණ විමර්ශන කොමිෂන් සභාව බවත්, නඩු පැවරීමෙන් පසුව නඩුවට අදාළ ලේඛන අස්ථානගත වීම මෙන් ම ඒවා හිටිහැටියේම හමුවීම හේතුවෙන් විශේෂ විභාගයක් සිදු කළ යුතු බවත් පළමු විත්තිකරු ප්‍රියංකර ජයරත්න වෙනුවෙන් පෙනී සිටි ජනාධිපති නීතිඥ ශවේන්ද්‍ර ප්‍රනාන්දු මහතා අධිකරණය හමුවේ කියා සිටියා.

ප්‍රියංකර ජයරත්න මහතා සිවිල් ගුවන් සේවා අමාත්‍යාංශය භාර අමාත්‍යවරයා ව කටයුතු කරන කාලයේ දී, එනම් 2011 අගෝස්තු 16 සහ 2012 දෙසැම්බර් 31 අතර කාලයේ දී සිය ලේකම්වරයා ලෙස කටයුතු කළ දෙවැනි චූදිත වන බාලමානගේ ජයවංශ නමැත්තාට එකී තනතුරට අමතරව අමාත්‍යාංශයේ ස්ථාපිත කර නොමැති තනතුරක් ඇති කර, එනම් සංවර්ධන සම්බන්ධීකරණ තනතුර ඇති කර, ඊට බඳවා ගැනීම සඳහා සිවිල් ගුවන් සේවා අධිකාරියේ අධ්‍යක්ෂ මණ්ඩලය පෙලඹීම ඇතුළු චෝදනා 06ක් යටතේ අල්ලස් හෝ දූෂණ විමර්ශන කොමිෂන් සභාව සිය පනත ප්‍රකාරව නඩු පවරා තිබුණා.

ඒ අනුව එම නඩුව යළිත් ජුනි මස 16 වැනිදා කැඳවීමට ද මහාධිකරණ විනිසුරු මංජුල තිලකරත්න මහතා නියෝග කළා.