සුප්‍රසිද්ධ පෞද්ගලික සමාගමක නොගෙවා පැහැර හරින ලදැයි කියන රුපියල් කෝටි පහකට අධික බදු මුදල් සමාගමේ අධ්‍යක්ෂවරුන්ගෙන් අය කර ගැනීමට කටයුතු කරනවාද? නැද්ද? යන්න පිළිබඳ නීතිපතිවරයාගේ ස්ථාවරය ජූලි 29 වැනිදා අධිකරණයට දැනුම්දෙන ලෙස කොළඹ අතිරේක මහේස්ත්‍රාත් තරංගා මහවත්ත මහත්මිය අද (10) දේශීය ආදායම් දෙපාර්තමේන්තුවට නියෝග කළා.
එම සමාගමේ අධ්‍යක්ෂකවරයකු වශයෙන් සිටියදී මිය ගිය ලලිත් කොතලාවල, සිසිලියා කොතලාවල කාවන් පෙරේරා ඇතුළු අධ්‍යක්ෂකවරුන් අට දෙනකුට එරෙහිව දේශීය ආදායම් කොමසාරිස්වරයා පවරා තිබූ නඩු තුනක් අද කැඳවීමෙන් පසුව මහෙස්ත්‍රාත්වරිය මෙම නියෝග සිදුකළා.
2002 වසරේ සිට 2009 වසර දක්වා නොගෙවා පැහැර හැරින ලද වැට් බද්ද වන රුපියල් 16,966,816.83 ක්, ජාතිය ගොඩනැගීමේ බදු වන රුපියල් 38,679,770.80 ද 2018 වසර සඳහා නොගෙවා පැහැර හැර ඇති රුපියල් 2,242 ,097ක වැට් බදු මුදල් අයකර ගැනීම සඳහා මෙම නඩු තුන 2021 වසරේ දී පවරා තිබුණා.
නඩුව කැඳවු අවස්ථාවේ දී වගඋත්තරකරුවන් වෙනුවෙන් පෙනී සිටි ජනාධීපති නීතිඥ මොහොමඩ් ආදමලී මහතා කරුණු දක්වමින් අදාළ සමාගම සම්බන්ධයෙන් ශ්‍රේෂ්ඨාධිකරණය නිකුත් කළ නියෝගය ප්‍රකාරව සමාගමේ වත්කම්වලින් වගකීම් ඉටුකිරීමට දැනුම් දී ඇති බව ප්‍රකාශ කළා.
ශ්‍රේෂ්ඨාධිකරණ නියෝග අනුව මෙම නඩුව සම්බන්ධයෙන් දේශීය ආදායම් කාර්යාලය තීරණයක් ගත යුතු බව ද ජනාධිපති නීතිඥවරයා අවධාරණය කෙරුණා.
දේශීය ආදායම් කොමසාරිස්වරයා වෙනුවෙන් කරුණු දැක්වූ නීතිඥ දිනේෂ් පෙරේරා මහතා කරුණු දක්වමින් නීතිපතිවරයාගේ උපදෙස් සඳහා අදාළ උද්ධෘත නීතිපති දෙපාර්තමේන්තුවට යොමු කර ඇති බව පැවසුවා.
දෙපාර්ශ්වයේ කරුණු සලකා බැලීමෙන් අනතුරුව නීතිපතිවරයාගේ ස්ථාවරය ජූලි 29 වැනිදා අධිකරණයට දැනුම්දීමට නියෝග කළ මහේස්ත්‍රාත්වරිය මෙම නඩු එදින යළි කැඳවීමට ද දින නියම කළා.
