ශ්වසන අර්බුදයකින් පීඩා විඳින ෆ්‍රැන්සිස් පාප් වහන්සේ අසාධ්‍ය තත්ත්වයේ පසුවන බව වතිකානුව සෙනසුරාදා (22) නිවේදනය කළා.
ශ්වසන අපහසුතාවක් හේතුවෙන් ශුද්ධෝත්තම පාප් වහන්සේ පසුගිය 14 වනදා හදිසියේම රෝහල් ගත කරනු ලැබුවා.
උන්වහන්සේගේ සෞඛ්‍ය තත්ත්වය පිරිහී ගොස් ඇති බවත්, උන්වහන්සේ “දිගුකාලීන ඇදුම වැනි ශ්වසන අර්බුදයකින්” පීඩා විඳි බවත්, රුධිර පාරවිලයන අවශ්‍ය බවත් වතිකානුව ඊයේ සිදුකළ නිවේදනයේ සඳහන්.
එමෙන්ම උන්වහන්සේට අතිරේක ඔක්සිජන් ලබාදීම අඛණ්ඩව සිදුකරන බවත් වතිකානුව සඳහන් කරනවා.
මේ වනවිට 88 හැවිරිදි වියේ පසුවන ෆ්‍රැන්සිස් පාප් වහන්සේට අවශ්‍ය සියලු ප්‍රතිකාර නොඅඩුව සිදුකෙරන බවයි වතිකානුව වැඩිදුරටත් සඳහන් කළේ.
මේ අතර පාප්තුමාගේ වෛද්‍යවරු පසුගිය සිකුරාදා (21) ප්‍රවෘත්ති සාකච්ඡාවක දී සඳහන් කළේ උන්වහන්සේගේ ජීවිතයට ආසන්න අවදානමක් නොමැති නමුත්, අනතුරෙන් මිදී නොමැති බවයි.
